Zanin aṭangin Euro 2020 Quarterfinal : Dar 12:30-ah Belgium Vs Italy

European Championship quarterfinal-a en châkawm ber chu Belgium leh Italy inkhel a ni a, champion rinkai pahnih hi zanin dar 12:30 hian Allianz Arena, Munich-ah an inkhel dawn.

Belgium player pawimawh pahnih Kevin De Bruyne leh Eden Hazard te chuan nimin thleng khan training an la zawm lo a, an inlan thei lo a nih chuan Red Devils tan channa nasa tak a ni thei ang.

Group Winner
Belgium leh Italy hian qualifier aṭang tawhin record an nei ṭha a, vawi 10 an khelhah an chak vek. Red Devils hian goal 40 khungin goal thum chauh an chhuah a, Azzuri hian goal 37 khungin goal li an chhuah ve bawk.

Euro 2020-ah pawh team pahnih hi an che ṭha chhunzawm. Belgium hi group B-ah awmin an khingpui Russia (3-0), Denmark (2-1) leh Finland (2-0) an hneh vek a, pakhatna ni chungin knockout stage an lut.

Roberto Martinez-a hote hian last 16-ah champion lai Portugal an hmachhawn a, Thorgan Hazard-a goal hmangin 1-0 in an chak. Belgium hian tun inelnaah goal riat an khung tawh a, goal khat chiah a la chhuah.

Italy pawh hi group A pakhatna an ni a, an khingpui Turkey (3-0), Switzerland (3-0) leh Wales (1-0) an hneh vek a, goal khatmah an chhuah lo.

Amaherawhchu last 16-a Austria an hmachhawn ṭumin hun pangngaiah goal an khung thei lo a, extra time-ah 2-1 in hnehna an chang. Match 11 chhung goal chhuah tawh lo Azzuri-in Austria lakah goal an chhuah a, chutihrualin Italy hian match 31 chhung hneh loh an tawng tawh lo. An chak loh hnuhnun ber chu September 10, 2018 daih tawh kha a ni a, Portugal lakah 1-0 in an chak lo.

Eng nge an sawi?
Belgium coach Roberto Martínez chuan, "Ṭan phat aṭangin Italy-in an nawr dawn. Khelh dan nghet tak an nei a, player tinin an tih tur an hria a, an nung ṭha bawk," tiin an khingpui turte a fak.

Everton coach hlui Martinez chuan sawi chhunzawmin, "Kan vanduai a, last 16-ah team ṭha bik Portugal kan hmachhawn avangin tha kan seng hnem hle. Kan vanneihna erawh chawlhna hun ṭha kan nei," tiin team dinhmun a sawi.

Belgium hi FIFA ranking-ah pakhatna an ni a, tun inelnaa che ṭha Roberto Mancini enkawl Italy nena inkhel tur hi en a châkawm hle. Manager ṭha pahnih intawn hnuhnun ber chu 2013 FA Cup final-a a ni a, Martinez-a enkawl Wigan Athletic-in Mancini enkawl Man City 1-0 in an hneh.

Mancini buaina duhthlan tur tam
Italy-in quarterfinal an thlen meuh chuan Roberto Mancini-a chhawr theih turin player 26 an dam kim a, Italian manager thluak ṭha bik pawh a rilru a insual nasa khawp ang. Tlarhnung aṭangin buaina a awm ṭan nghal a, Switzerland an hneh ṭuma inhliam vanga lakchhuah Giorgio Chiellini a dam tawh. Kum 36 mi Chiellini leh a thlaktu kum 33 mi Francesco Acerbi te buk an ni dawn a, Romelu Lukaku veng turin Chiellini a luh a rinawm zawk.

Mual sirah match hmasa bera Turkey nen an inkhelh ṭuma inhliam Alessandro Florenzi a dam leh tawh a, amaherawhchu Giovanni Di Lorenzo nek chhuah a har ṭalh tawh ang. Midfield laiah Jorginho a chiang a; Marco Verratti, Manuel Locatelli leh Nicolo Barella te aṭangin pahnih a thlan a ṭul dawn. Euro 2020 an khelh tawhna aṭanga thlir chuan Verratti a awl a rinawm a, amaherawhchu PSG midfielder hi Mancini-a'n tun hmain a duhsak tawh ṭhin.

Austria laka chakna goal khungtu Federico Chiesa-a'n inelna ṭantirh aṭangin first eleven chang thei tura sawi a ni a, Wales nena an inkhelh ṭumah chauh bul a ṭan. Kum 23 mi Chiesa hi Domenico Berardi aia lut tura sawi a ni. Italy tlarhmaa awm Ciro Immobile, Lorenzo Insigne leh Berardi te hi Serie A-ah che ṭha mah se inelna sang knockout stage chinah goal an la khung meuh lo. Insigne hian Champions League knockout-ah goal hnih a khung a, pakhat hi penalty a ni. Euro 2020-ah Azzuri tlarhmate fiahin an awm ang.

KDB leh Hazard tel lohna?
Belgium leh Italy te inkhelh tura sawi hlawh ber chu captain Eden Hazard leh Kevin de Bruyne te chanchin a ni a, Portugal nen an inkhelh ṭuma inhliam player ṭha pahnih hi an khelh theih a rinawm lo zawk.
Red Devils hian Hazard leh KDB tel loin Euro 2020 an ṭan a, an match hmasa bera Finland 3-0 a an hneh ṭumin De Bruyne hi a inlan lo hrim hrim a, Hazard erawh minute 72-naah a lut thung.

Player pahnih aia lut tura ngaih chu Dries Mertens leh Yannick Carrasco te an ni a, kum 34 mi Napoli forward Mertens hian ram tan match 101 zet khel tawhin goal 21 a khung tawh. Atletico Madrid midfielder Carrasco hi a inlan a nih chuan ram tan match 50-na a ni dawn.

Belgium team hi golden generation tia sawi an ni a, amaherawhchu tun thlenga nomawi an la chawi loh avangin golden generation-a an sawi tel ṭhin captain hlui Vincent Kompany phei chu a chawl tawh. Portugal an hneh ṭuma tlarhnunga ding Thomas Vermaelen (35), Jan Vertonghen (34) leh Toby Alderweireld (32) te chu veteran player tia sawi theih an ni a, chutihrualin goalkeeper-ah Thibaut Courtois an kawl a, Cristiano Ronaldo telna team-in goal an khung thei lo.

Red Devils sawi tawh chuan Romelu Lukaku sawi hmaih a thiang lo a, Inter Milan striker hian match li a khelh tawh aṭangin goal thum a khung tawh. KDB leh Hazard te an tel thei lo a nih chuan Manchester United striker hlui hi a pawimawh lehzual ang.