Hmahruaitu nih inchuhna - England vs Czech

England a nih tawh chuan thawm a ring ṭhin a, Scotland an hneh zawh loh avangin fans leh media tam takin an chuk rawn mek.

Chutiang boruak karah chuan zanin dar 12:30 hian England leh Czech Republic an inkhel dawn a, he inkhela chak zawk chuan group hmahruaitu ni chungin last 16 an lut ang.

Team pahnih hian point li an neih ve ve tawh avangin chak lo zawk tan pawh knockout luhna 'chance' a la sang viau a, hei vang hian boruak a 'hot' loh erawh ring suh.

An inkhelhna tur hmun hi Wembley Stadium a ni a, beisei nei sang tak Three Lions fan-ten an muala an ram team chak zo lo lai hmuh an duh lo ang.

Thawnthu hlui
England-in thawnthu hlui an keu let a nih chuan hahdam taka inkhel tur thlir tur zawk an ni. Team pahnih hi qualifier-ah group khatah an intawng a, vawi hnih an intawnah vawi khat ve ve an chak.

England hian Wembley-a an inkhelh ṭumin 5-0 in an sawp a, March 2019 a inkhelah hian Raheem Sterling chuan hattrick siamin Harry Kane chuan goal khat a khung a, Tomáš Kalas-a'n an lamah a ti lut bawk.

October 2019-ah team pahnih an intawng leh a, Prague khawpuia inkhelah 2-1 in Czech an chak thung. Prague khawpuia an tlawm ṭuma England tana bul ṭan zingah Michael Keane leh Danny Rose tih loh chu England squad-ah an la awm vek.

Three Lions coach Southgate chuan, "Wembley-a kan lo chak tawhna ai khan Prague-a kan result khan tun dinhmun hi a hrilhfiah zawkin ka hria. Ram tana an inpekna hi a thuk em em a, an quality kan hai lo bawk," a ti a, fimkhur takin Wembley-a an thawnthu hluia innghat thei an nih loh thu a sawi.

Thawnthu ngaihnawm
England tan Wembley-a team pahnih intawnna thlirletin a ngaihnawm a, Czech tan erawh Wembley-a Euro an khelh hnuhnun ber kha thlirlet a châkawm zawk ang.

England-in kum 1996-a Euro an thlen khan kum 1993-a Czechoslovakia inṭhenhran hnua a vawi khat nan Czech-in Euro an khel a, final hial an inpetkai thei.

Kha thawnthu ngaihnawm kha tun thlengin Czech football chanchinah a la thi thei lo a, infuihphur nan an hmang ṭhin - zaninah phur takin England an hmachhawn dawn.

Hriat tel tur chu Euro 96 ai khan Czech hian bul an ṭan ṭha zawk - 1996-ah hian an match hmasa pahnih aṭangin point thum chiah an nei a, tunah chuan point li an nei sa.

Mahse...
Zanin inkhel tur hian danglamna a nei a, mi tam tak rilrua zawhna awm chu ram pahnih hian group hmahruaitu nih an duh kher ang em? tih chu a ni a, a chhanna pek harsa tak a ni.

Group D hmahruaitu hian 'group of death' tih hiala an sawi group F-a pahnihna an tum dawn a, he group aṭang hian France, Germany leh Portugal chu pahnihna la ni thei vek an ni.

Hetihrual hian group group D-a pahnihna hian group E-a pahnihna an hmachhawn dawn a, Sweden, Slovakia, Spain leh Poland-te chu group E aṭanga pahnihna la ni thei vek an ni a, group of death lam ai chuan tum an thlanawm zawk.

Chutihrual chuan England leh Czech hian champion an mitthla ngam ang tih a chiang a, European champion nih an duh chuan kalkawnga chetsual an duh lo ang.

Kane a khel ang - Southgate
England striker chhuanvawr Harry Kane-a'n Euro 2020-ah goal a la khung lo a ni mai lo a, Croatia leh Scotland an hmachhawn tawh inkhelah bul a ṭan ve ve chungin target-ah shot a nei miah lo!

Mahse, heti chung hian Southgate-a'n a captain leh striker a rin chhunzawm tur thu a sawi a, England coach chuan, "Inkhel bul a ṭan lo ring tawp rawh u," a ti. Southgate chuan, "Kane hi goal-a khung vang chauha player pawimawh a ni lo a, goal a luh theih nana a tha thawh leh team tan a hnathawhte hi kan hriat tel a ṭul a ni," a ti zui a, a captain a chhan hle.

Kum 27 mi Kane hian season hman zawh takah khan league-ah goal 23 khungin assist 14 a nei a, Premier League-a goal leh assist ngah ber a ni - a chunga beiseina a sang hi a awm lo hran lo. Mahse, Southgate chuan a striker hi chhan chhunzawmin, "Kane chungchang hi chu zawhna tam tak a awm ang tih ka hre sa a, mahse, hetiang ang hun hi chu vawi za tam a lo paltlang tawh a, keiin vawi tam hetiang zawhna hi chu ka lo chhang tawh bawk.

"Mahse, a tawpah chuan goal hmang bawkin chhanletna a pe ṭhin a, chutiang bawk chu a thlen leh ka beisei. Kan player pawimawh ber a ni," a ti - Czech lakah bul a ṭan dawn tih a chiang. England full-back Kieran Tripper pawhin an captain hi chhanin, "Harry hian chance a nei ang a, goal-a la khung em em ang. Training-naah pawh a thawkrim hle a ni," a ti.

Kane hian England tan match 56-a khelhah goal 34 a khung thei a, mahse, an match hnuhnung zawka Scotland an hmachhawn ṭumin vawi 19 chiah ball a tawk fuh a, minute 74-naah lakchhuah a ni. England midfielder Phil Foden chuan, "Kei chuan a chauh vang niah pawh ka ngai lo a, a tan chance kan siamsak hnem tawk lo a, ama thiam loh a ni lo.

"Harry hi khawvela ṭha ber pawl a ni a, a chungah rinna nghat a, a lama kan ṭan tlat hi a pawimawh ber chu a ni," tiin an captain a chhan ve bawk.