Zanin 12:30-ah Champions League Final
Europe-a club ṭha ber zawnna chu zanin dar 12:30 hian Estadio do Dragao, Porto-ah Premier League champion Manchester City leh Chelsea ten an khel dawn.
Thomas Tuchel-a'n season liam ta khan Paris Saint-Germain chu final a thlenpui a, nomawi inchuhnaah Bayern Munich lakah an vanduai a, pahnihna dinhmun hrehawmzia hrechiangtu a ni. Pep Guardiola pawhin Barcelona a chhuahsan hnuah Champions League nomawi a la chawi leh lo a, hun ṭha bik hi bawhpelh a tum lo ang.
Tuchel hattrick?
German manager Thomas Tuchel-a'n Chelsea a enkawl hnuah Manchester City ṭum hnih a hmachhawn tawh a, a hneh ve ve. Blues hian FA Cup semifinal-ah Hakim Ziyech-a goal hmangin April 17 khan City hi 1-0 in an hneh a, Pep leh a hote 'quadruple' beiseina a tawp nghal.
Manchester City-in Etihad Stadium phuba lakna remchang an nei a, May 8-a an inkhelh ṭum hian Pep-a hoten bul an ṭan ṭha. First half-ah Raheem Sterling hmanga hma an hruai hnuah Sergio Aguero-a'n penalty a hlah.
Argentine foward Aguero hian 'cial' taka khung tumin 'panenka' style-in a pet a, keeper Edouard Mendy-a'n a dan sak. Pep Guardiola a thinur a, Spanish manager thinurna belhchhah turin Chelsea-in Hakim Ziyech leh Marcos Alonso te hmangin an lehthal a, 2-1 in hnehna an chang.
Thomas Tuchel-a'n inngaitlawm takin Manchester City chu team ṭha bik an nih thu sawi mah se Premier League leh League Cup champion hi season khat chhungin vawi thum hneh thei dinhmunah a ding.
Team ṭha hnehtu
Chelsea hian final thleng turin Europe-a record ṭha ber Real Madrid an hneh a, London club hian Los Blancos hi an hneh satliah lo - chiang takin an hneh. Tuchel-a hote hian Real bakah hian final thleng turin La Liga champion Atletico Madrid leh FC Porto an hneh.
Final khelhna tur hi Porto khelmual a ni a, amaherawhchu Portuguese club an hneh ṭum hi chuan Covid-19 vangin Ramón Sánchez Pizjuán, Seville-ah an khel a, tun season-ah Estadio do Dragao an la inkhel bik lo.
Werner hi...?
Thomas Tuchel-a rilru tibuaitu tur chu Timo Werner a ni ngei ang. German forward hian pound maktaduai 54-in RB Leipzig aṭangin Stamford Bridge hi a zawm a, beiseina sang tak nei mah se goal hmaah a ke a hmui lo.
Kum 25 mi Werner hian tun season inelna hrang hrangah goal 12 lek a la khung a, offside vanga goal khung pawm loh a awm nual bakah chance ṭha hlah a ngah. Final boruak sangah goal chance hmuh tam a har ṭhin avangin Werner hi Blues ṭantute thinurtu a ni thei a, chutihrualin a khelh ṭhat ṭum a a nih hlauh chuan a tlan chakna ringawt pawh hi defender tan mang chhia a ni.
Chelsea tana lawmna tur erawh danglamna thlen thei tur player an kawl nual. City nen an intawn hnuhnun pahniha goal khung ve vetu Hakim Ziyech pawhin bul a ṭan a rinawm loh. A chhan chu Werner, Christian Pulisic leh Mason Mount te an awm tlat.
Mi bik Kante
Boruak sang leh team ṭha hmachhawnah N'Golo Kante ṭhatna a lang leh ṭhin a, French midfielder inngaitlawm zet hi khelmual chhungah chuan 'sakeibaknei' ang a ni a, a ball hauh a na hle. Semifinal-a Real Madrid an hneh ṭumin first leg leh second leg-ah man of the match a ni ve ve.
Kante tan tun ṭum hi Champions League final hmasa ber ni mah se FIFA World Cup nomawi, Premier League nomawi vawi hnih leh Europa League nomawi chawi tawhtu a nih avangin a talbuai lo ang. Tlarhnung aṭangin veteran defender Thiago Silva-a'n a thlawp dawn bawk nen Chelsea tlarhnung khawng ṭha viau tura ngaih a ni.
Chelsea player pawimawh Kante hi malpui hliam vangin Aston Villa nen an inkhelh ṭumin a inlan lo a, tunah erawh keeper Edouard Mendy nen training an zawm leh tawh. Man City hi team ṭha zawk an nih miau avangin goal venhim thiam pahnih Kante leh Mendy inlan thei tur hi Blues ṭantute tan thu lawmawm a tling.
City A Team
Chelsea hian Man City hi an intawnna hnuhnung pahnihah vawi hnih hneh mah se inchhuang thei tur erawh an ni lo, Pep Guardiola-a'n match hnihah hian player ṭha ber a khelhtir lo. Champions League final-ah erawh Pep-a'n a naute hi an ṭhat theih dan bera a ngaihin a rem ang.
FA Cup semifinal-ah Spanish manager-in team boruak a ngai pawimawh a, team chhungah vui an awm loh nan goalkeeper-ah pawh first keeper Ederson aiah United States keeper Zack Steffen a thlang. Tun hnaia rinrawla a hman Riyad Mahrez, Phil Foden leh Ilkay Gundogan bakah John Stones leh Oleksandr Zinchenko te bench-ah an awm.
An intawn hnuhnung berah Ederson-a'n bul rawn ṭan tawh mah se tlarhmaah ringawt pawh Sergio Aguero, Gabriel Jesus, Raheem Sterling leh Ferran Torres ten bul a ṭan a, Champions League final-ah heng player-te hian bul an ṭan nawn kher lo ang.
Man City nge ṭha zawk Chelsea? Tuchel nge thluak ṭha Pep? leh zawhna ṭhahnem tak chhan tur chu UCL final hi a ni dawn. Chhuanlam siam a thiang tawh dawn lo a, a bik takin Pep-a chungah pressure a tam. Bayern Munich-in Champion League nomawi an duh vangin Pep hi an lalut a, an duh ang a tih hlawhtlinsak lo - semifinal-ah ṭum thum a tla. Man City pawhin German club ang thoin UCL nomawi an duh a, zanina an chawi lo a nih chuan Pep-a sawiseltute an ṭanna ngaiah an nghet takin an ṭang chhunzawm thei ang.
Foden leh City
Manchester City-in sum ṭhahnem tak hmangin team an din a, player manto rual zingah academy player Phil Foden-a'n a lai lum a chang pha. Kum 20 mi Foden hian inelna hrang hrangah goal 16 a khung tawh a, City chauh ni loin England fachuam a ni chho der tawh.
Pep-a'n final-ah forward Aguero leh Jesus te aiah midfielder ṭha mi Kevin de Bruyne-a'n 'false nine' hna a rawn chelh a rinawm. Foden, KDB, Ilkay Gundogan, Bernardo Silva leh Riyad Mahrez te hoa Man City-in an nawr chu hmuhnawm a tling ang.
Tun season-a Man City danglamna erawh ṭum dang zawng aiin an tlarhnung a phui ṭha. Benfica aṭanga an lakluh defender hi Ruben Dias-a'n danglamna a thlen a, Premier League-ah pawh goal 32 chauh an chhuah. Chutihrualin Blues pawhin league-ah goal 36 chauh an chhuah a, tehfung hrang hrang aṭanga tehin final hi en a châkawm tawh takzet.
Kun-a Intiamna
Sergio Aguero chuan October 29, 2014-a a chanchin ziahna 'Sergio Kun Aguero : Born to Rise' tih tlangzarh a nih khan Champions League an chawi hma loh chuan Manchester City a chhuahsan loh tur thu a sawi. Aguero hian tun season tawpah Man City a chhuahsan dawn a, kum sarih liam taa a intiamna ti hlawhtling turin hun ṭha a inhawng.
Argentine striker hian City tana kum 10 a khelh chhungin goal 260 a khung tawh a, Man City tana goal khung tam ber record a siam. Kum 32 mi Aguero hian final-ah hmun pawimawh a chan rinawm lo mah se match hnuhnung bera Everton 5-0 a an hneh ṭumin bench aṭanga lutin goal hnih a khung. Inkhelh banah Pep-a'n mittui tla chungin Aguero hi player ṭha bik a nih thu a sawi a, Spanish manager hian Argentine striker thlah nan inlan theihna hun remchang a siam sak a rinawm hle.
Football hi tactic chauh a ni lo; player te nena kan inkar boruak leh rilru put hmang pawh a tel vek a ni. - Pep Guardiola Man City manager
Man City leh Bayern te hi tun season leh season liam ta a, team ṭha bik an ni a, hnaih tumin hma kan la. Football ṭhat deuhna chu minute 90 chhungah hi chuan inkar zau tak hi a tih zem theih. - Thomas Tuchel
Chelsea manager
First XI tura beiseite
Man City : Ederson; Walker, Stones, Rúben Dias, Zinchenko; Bernardo Silva, Fernandinho, Gündogan; Mahrez, De Bruyne, Foden
Chelsea : Mendy; Christensen, Thiago Silva, Rudiger; Azpilicueta, Jorginho, Kanté, Chilwell; Pulisic, Werner, Mount
Referee
Antonio Mateu Lahoz (ESP)
Assistant referees
Pau Cebrián Devís (ESP)
Roberto del Palomar (ESP)
Video Assistant Referee
Alejandro Hernández (ESP)
Assistant Video Assistant Referee 1
Juan Martínez Munuera (ESP)
Iñigo Prieto (ESP)
Assistant Video Assistant Referee 3
Pawel Gil (POL)
Fourth official
Carlos del Cerro Grande (ESP)
Referee ka nihna anga ka hun tawn hi nuam ka ti. Champions League final ka kaihruai tur hi ka tan chuan thilmak a ni. Dik taka sawi chuan UCL final-a referee ka nih hi ka ring ngai lo. Ka chhungkuaa kan captain ka nu hian uluk takin min lo thlir ṭhin a, inkhelh bana ka nui hmel a hmuhte hian a lo hlim ṭhin hle. Ka pa fuihna thu hi ka hre reng ṭhin a, van lam ka thlir hian ka hre chhuak ṭhin. - Mateu Lahoz, UCL 2021 final refereee
Entu 16,500 an awm dawn
Champions League final hi a hmunah entu 16,500 an awm thei dawn a, mi 50,000 ṭhut theihna Esradio do Dragao-ah an thawl viau dawn a, entu nei loa inkhelh ai chuan club pahnih tan stadium thawl deuha fans an awm tur pawh hi chanchin lawmawm a ni.
Manchetser City chuan an ticket chan 6,000 chu an hralh zo, club neitu Sheikh Mansour chu UCL final an khelh hmasak ber tur atan hian a phur hle, City fans Portugal-a final en tura kal zawng zawngte chu kal man senso a tumsak vek dawn.
Chelsea erawhin hri leng kaihhnawih vangin buaina an nei, inkhel entute kalna tur bika ruahman thlawhtheihna buaipui kawngah harsatna an nei a, hei vang hian an ticket chanpual aṭangin 800 chuang chu hralh loin an pe kir!
UCL final inkhel a hmuna enna ticket man to ber hi £515 (Rs 52,896) a ni a, pahnihna chu £386.50 (Rs 39,702) niin, pathumna chu £154.50 (Rs 15,870) a nih bakah a man tlawm ber chu £60 (Rs 6,163) a ni.