AC Milan-in Lille keeper an lalut

Season thara Cham­pions League khel tur AC Milan chuan an keeper chhuanvawr Gianluigi Donnarumma chan dawn mah se manganna tur an nei lo - a hmun ruak luah turin Lille goalkeeper Mike Maignan chu an lalut.

Kum 25 mi keeper hian San Siro-ah hian kum nga chhung cham turin contract-a ziak a, a man zat hi tarlan ni lo mah se Italian media-te chuan Milan hian euro maktaduai 15-a an lakluh thu an puang.

Paris St-Germain aṭanga inzir chhuak keeper hian kum 2015 khan Lille tan a khel ṭan a, 2018-19 season khan Ligue 1 Goalkeeper of the year-ah thlan a lo ni tawh.

Season hman zawh taka Lille-in league nomawi an chawi theih nan player ṭangkai a ni a, match 38-a khelhah vawi 22 chu goal chhuah loh a nei - Ligue 1 record dinglai chu match khat chiahin a phak lo a, Euro 2020-a France squad-ah koh a ni bawk.

Hetihlai hian Maignan-a thlak tur Donnarumma chu Juventus, Chelsea leh Manchester United nen sawizawm mek a ni a, kum 22 mi keeper hian khawi lam nge a pan dawn he thu buatsaih a nih thleng hian a la chiang thei lo.

Milan sporting director Paolo Maldini chuan, "Donnarumma chhuak tur hi pawm thiam a har a, mahse, club pakhat tana career hman zawh tawp hi tun hnaiah chuan a harsa em em ve bawk a ni.

"A chang chuan kawng zawh tur dang thlan a ngaih chang a awm a, a hma hun atan duhsakna tinreng ka hlan a ni," tiin kum 16 lek ni chunga Milan tana a match hmasa ber kheltu Donnarumma chu a thlah.