Man United B Team-in Wolves an hneh

25th May, 2021

Ole Gunnar Solskjaer-a'n Europa League final an khelh dawn avangin Premier League match hnuhnung berah Villarreal hmachhawn tura ngaihte a hahchawlhtir. Manchester United B team tiha sawi theihten Molineux Stadium-ah Wolverhampton Wanderers 2-1 in an hneh.

Man United hian a vawi khat nan season khat chhungin khualmualah hneh loh an tawng lo a, pahnihna an nih bawk avangin season chhia a ni lo. Wolves erawh manager Nuno Espirito Santo hoa an match hnuhnung berah an chak lo thung.

B Team inkhel chu
Man United tana bul ṭantute zingah academy naupang pahnih Anthony Elanga leh Amad Diallo te an awm a, tun season-a khel tam lo Juan Mata, Daniel James, Nemanja Matic, Donny van de Beek, Alex Telles, Axel Tuanzebe, Eric Bailly leh Brandon Williams te an ni hlawm.

Europa League final-ah David de Gea a inlan a rinawm a, first keeper-a ngaih Dean Henderson chu goal vengtu a ni. Amaherawhchu Molineux Stadium-ah kum 19 mi Elanga-a'n bul a ṭan ṭha a, goal hmaah a hriam tih a lang.

Swedish striker Elanga-a'n chance ṭha a hlah hnuah minute 13-naah Man United hmahruaina goal a khung. Goal luh hnuah erawh Wolves goal bawh a na a, an phu angin Nelson Semedo-a'n minute 39-naah siphurh a sut.

Man United bawk an vannei a, VAR hmanga en let a nih hnuah Donny van de Beek-a'n penalty a hlawh chuak. Juan Mata-a'n penalty hi goal-ah a chantir a, second half-ah goal a lut tawh loh avangin chakna goal a ni zui bawk.

Maguire a inpeih lo
Manchester United manager Ole Gunnar Solskjaer chuan, "A beiseiawm loh. Maguire hi final-ah a khel dawn a nih chuan Thawhlehniah training a neih a ngai a, a inpeih hman ring suh u," tiin an sawi a, final hi May 26, Nilaini zanah khelh a ni ang.

Europa League-a Man United khingpui tur Villarreal erawh Inrinniah an inkhelh tawh avangin ni khatin inpuahchahna hun an nghah. Solskjaer chuan, "La Liga an ti ṭha. Match sarih khelh hun an sawn hma avangin Villarreal-in ni khatin training-na hun an ngah a, ka thlawp khawp mai. Mahni ram club-te puih theih dan a awm a nih chuan pui hi a ṭha a ni," tiin a sawi a, season thara inrintawkna neih nan nomawi chawi a pawimawh thu a sawi.