Europa League final khel lo tur Maguire?

Manchester United-in May 26, Nilaini zan dar 12:30-ah Villarreal nen Europa League final an khel dawn a, English club-in hliam vangin an captain Harry Maguire a chhawr theih a beiseiawm loh.

Kum 28 mi Maguire hi Aston Villa nen an inkhelh ṭumin a ke rek a ti na a, Fulham nen an inkhelh ṭum khan tiang a la hawl. Ole Gunnar Solskjaer chuan, "Tunah chuan a kal thei tawh a, tlan thei tur chuan hun a duh ang. Final-a a khelh theih nan theihtawp kan chhuah dawn a, mahse kan chhawr theih ka ring lo," tiin a captain chungchang a sawi.

Premier League-ah Manchester United hi pahnihna an ni chiang tawh a, Pathianni zan dar 8:30 hian Molineux Stadium-ah Wolverhampton Wanderers nen an inkhel ang.

Norwegian manager Solskjaer chuan, "Man City el pha tur chuan player pahnih emaw pathum emaw chu nipui transfer laiin lak a ngai ang. Tunah rih chuan inkar a zau deuh a, hmasawn kan mamawh," tiin a sawi.