Football mangṭha tur Wes Morgan

Premier League-a Leicester City champion puitu captain Wes Morgan chuan tun season tawp rual hian a contract a hmang zo dawn a, football khelh a chawlhsan zui nghal bawk ang.

Kum 37 mi Morgan bakah hian Christian Fuchs leh Matt James te pawhin King Power Stadium an chhuahsan dawn a, Pathianni zana Tottenham nen an inkhelh tur chu Foxes player an nih laia an match hnuhnung ber a ni dawn ta.

Leicester City chuan thuchhuah siamin, "Premier League kan champion ṭuma captain Wes Morgan chu season tawp rualin a chawl dawn. Club tan season kua zet ṭha takin a khel a, professional match 750 chuang a khel thei," tiin thlahna thu an sawi.

Fuchs chungchang sawi bawkin Foxes chuan, "Legend Christian Fuches chuan 2020-21 season tawp rualin club a chhuahsan dawn, kum ruk chhungin club tan Premier League leh FA Cup min chawi pui," an ti.

Morgan leh Fuchs te hi Premier League champion an nih theih nana player pawimawh bik an ni. Chelsea hneha FA Cup an chawi ṭum pawh khan hun tawp dawnah Morgan hi luhtir a ni - league match hnuhnung berah erawh Spurs hneh ngei an ngaih dawn avangin an inlan kher a rinawm loh.