2020-21 season Premier League a tiak dawn ta : Pathianni zanah Man City-in nomawi an chawi dawn

Manchester City-in Premier League nomawi an chawi dawn ta. Pathianni zan dar 8:30 hian Etihad Stadium-ah Pep Guardiola hoten Everton an hmachhawn ang a, inkhelh banah nomawi an chawi dawn. Citizen tan Premier League nomawi chawi hi thil thar a ni tawh lo a, amaherawhchu Sergio Aguero thlahna hun an hman dawn avangin Pathianni zan hi hun bik a ni ang.

Man City chanchin hi Aguero tel lo chuan a kim lo a, 2011-12 season-a Premier League nomawi an chawi hmasak ber ṭuma Argentine forward goal kha football ngainatute tan theihnghilh theih a ni tawh lo. Citizen-in champion turin chak an mamawh a, minute 90 a nih pawhin QPR 2-1 in an chak. Minute 90+2 naah Edin Dzeko-a'n Man City siphurh a sut a, 90+4-ah Aguero-a'n champion-na goal a khung.

Commentator lar Martin Tyler chuan, "Agueroooo" tih mawi fahranina thluk a, "Ka tiam a che u, hetiang hi inhmu leh tawh ngai lo ang," tiin an chham zui. Man City-in Aguero goal vangin nomawi an chawi a, an hmelma Manchester United aia goal difference hmanga an ṭhat avangin an champion. Thil thlen dan chu thawnthu ang mai a ni a, Man United ṭahna goal hi Man City ṭantute lawm avanga an mittui farna goal a ni thung.

Tunah chuan Etihad Stadium-a thil ropui thlen ropui a thlen aṭang khan kum kua a ral leh ta a, kum 32 mi Aguero pawh thlah liam a ṭul ta. Man City chuan inkhel entu tur mipui 10,000 hnenah ngenna an siam a, inkhelh banah Aguero-a'n thlahna thu a sawi dawn avangin tumah an ṭhutna kalsan lo turin an ngen.

Man City hian ngenna pawh siam lo pawh ni se, ticket chang pha mi 10,000 tan hmaih phal chi a ni lo. Aguero hian kum 2011 khan Atletico Madrid aṭangin English club hi pound maktaduai 35-in a zawm a, kum 23 chauh la ni mah se Atletico hi Europa League-ah a champion pui tawh a, U20 World Cup-ah Argentina vawi hnih champion pui tawhin Olympic (2008) gold a la tawh bawk.

Argentine striker hian Man City tan goal Premier League-ah goal 182 a khung a, a tluk loh chu Alan Shearer (260), Wayne Rooney (208) leh Andrew Cole (187) te chauh an ni. Aguero hi Barcelona nen sawi zawm a ni a, Etihad Stadium-ah jersey dang hain rawn let leh pawh ni se a phu miau avangin Man City ṭantuten zahna an lantir ang.

Manchester City leh Aguero ten hmabak an la nei a, Champions League final khelh tur an la nei. Chelsea nen an inkhelh hmain inrintawkna nei turin chak an mamawh a, an match hnuhnung bera Brighton & Hove Albion an hneh loh avangin Everton hi hneh ngei an tum dawn a ni.

Thlirna tawi
- Man City-in Pathianni zanah nomawi an chawi dawn
- Man City-in Premier league nomawi vawi nga an chawina tur a ni a, English champion vawi sarih an nihna a ni
- Man City leh Man United ten Champions League an khel dawn.
- UCL hmunruak pahnih hi Chelsea, Liverpool leh Leicester City ten an inchuh ang.
- UCL khel pha loin Europa League an khel dawn a, hmunruak pakhat dang hi West Ham leh Spurs ten an inchuh ang.
- Season thar aṭangin inelna thar Europa Conference League a awm dawn a, club pakhat tan chauh hmunruak awmin Hammers leh Spurs bakah Everton leh Arsenal ten an la beisei thei ang.