La Liga: Atletico nge Real champion dawn?

Spanish La Liga season chu zaninah a tawp dawn a, champion thei team pahnih an la awm! Atletico Madrid leh Real Madrid-ten champion an la beisei ve ve a, zanin dar 9:30-ah an inlan dawn.

Atletico hian Real Valladolid chu khual­mualah an tlawh dawn a, Real Madrid-in Villarreal an mikhual dawn thung - champion turin team pahnih tan point hloh a thiang lo.

Diego Simeone-a enkawl team tan champion turin chak a tawk a, point thum an hlawh chhuak a nih chuan Real result-in an dinhmun a nghawng pha lo ang.

Real Madrid tan chak ngei ngei a ngai a, Atletico-in point an hloh tel a ngai bawk - a tawi zawnga sawi chuan champion turin Real tan vanneih tel a ngai a, Atletico erawh an kutah engkim a innghat.

Real tan Ronaldo?
Atletico leh Valladolid inhmachhawn turin chanchin ngaihnawm danglam tak an nei a, Valladolid President hi Real Madrid legend Ronaldo a ni - Brazilian striker ropui ṭhin hian Spanish club-ah hian 82% share a nei mek.

Ronaldo hi Real coach Zinedine Zidane nena an khelhdun hma pawh khan an lo inkawm daih tawh a, Real tana an khelh dun hnuah an inkawmngeih lehzual - club president Florentino Perez nen an inhnaih viau bawk.

Hei vang hian Ronaldo-a'n a club hlui a duhsak ang tih a chiang a, chak loh a duh dawn lo - chu chauh a ni lo. Valladolid hi La Liga table-ah 19-na an ni mek a, Spanish top flight league khelh chhunzawm tur chuan chak an mamawh.

Atletico tan point thum hlawhchhuah a harsa dawn tih a lang chiang a, team pahnih hi inthlau viauin lang mah se Atletico-in champion tumin an khel dawn a, Valladolid-in 'thih leh dam kara leng' an ni tih hre chungin an nun khawchhuah nan an bei dawn bawk - a hmuhnawm loh ring suh.

Suarez lo chu an awm lo
Atletico-in an league match hnuhnung berah Osasuna chu 2-1 in an hneh hram a, minute 88-naah Luis Suarez chuan chakna goal a khung - an champion dawn leh dawn loh chu an kutah a awmzui phah.

La Liga champion thei dinhmuna ding mek Simeone chuan, "Suarez hian tawnhriat a nei ṭha em em a, khatiang ang dinhmun harsaa kan awm laia min chhanchhuak tur chuan ani lo chu an awm chuang lo," tiin Suarez hi a fak zui.

Barcelona duh loh hnu striker hian tun season La Liga-ah match 31 khelin goal 20-a khung a, assist vawi thum a nei bawk. Zaninah pawh Suarez bawk hi ven bik a ngai leh dawn a, relegate thei dinhmuna ding Valladolid tan a awlsam dawn lo.

Atletico hian Suarez bakah Angel Correa, Joao Felix, Saul Niguez, Koke leh Marcos Llorente an nei tel bawk tih hriat a ṭha a, an khelh ṭhat ni chuan eng team pawh hneh thei khawpa ṭha an ni.

Valladolid an buai
Atletico tana thu hriat nuam tak chu an ṭhat dan bera Valladolid an inlan thei lo tur hi a ni. Midfielder pawimawh Rubén Alcaraz leh goalkeeper Roberto Jiménez-te chu hrem vangin an inlan thei dawn lo.

Raul Garcia leh Kenan Kodro-te chu hliam vangin an inlan thei dawn lo a, player pawimawh tia sawi tur erawh an ni lo - Chile international Fabián Orellana inlan thei lo tur erawh an tan a pawi pha thei ang. Hetihlai hian Atletico tan centre back Stefan Savic chu hrem vangin a inlan thei dawn lo a, a hmun ruak hnawhkhat tura Jose Gimenez a awm avangin buaina erawh a awm lo tura ngaih a ni.

Thomas Lemar chu malpui hliam vangin a inlan dawn lo bawk a, hei pawh Atletico squad chhah dan enin manganna tur niin a lang lo.

Zidane hma hun
Real Madrid tan champion turin chak ngei ngei a ngai a, Zinedine Zidane-a tan a hna chan lo turin champion a ngai bawk - Real tan zanin inkhel tur pawimawhzia hi thua sawifiah chi a ni lo.

Spanish media ṭhenkhat chuan Zidane hian a player-te hnenah a chhuah tur thu a sawi tawh ang hialin an tarlang a, Juventus a pan dawn niin an sawi hial. Hetiang boruak karah hian Juve boss hlui Massimiliano Allegri hming a ri a, kum 53 mi coach hian Real dinhmun tur ngaihchan phawt a duh avangin amah sawmtu club dang a hnar hiala sawi a ni.

Allegri dinhmun an sawi aṭanga lang chu Real an champion chuan Zidane a cham ang a, an champion loh chuan a chhuak dawn tihna a ni - hei vang hian Allegri hian La Liga tawp ni a nghak niin a lang.

Kawng awlsam a ni lo
Real tan kawng a awlsam dawn lo - mahni muala khel tur an nih avanga chak turah an indah sa a nih chuan Zidane-a nauten an zuam sual ang.

An mikhual tur Villarreal hi table-ah pasarihna an ni mek a, pangana Real Sociedad hi point khat chiahin an thlau a, parukna Real Betis nen an point hmuh zat a inang bawk.

La Liga-a pangana leh parukna ten season tharah Europa League an khel ṭhin a, Arsenal boss hlui Unai Emery enkawl team hian beisei nei chungin Real khelmual an pan dawn tihna a ni.

Villarreal hi Europa League final lut thei khawpa team ṭha an ni a, Real lakah tlawm sa rilru puin an leng lo ang tih hriat a pawimawh.

Lung a leng
Real Madrid fans tan chuan zanin inkhel hi en loh phal chi a ni lo - Isco chu season thara chhuak tur anga sawi a ni a, Raphael Varane leh Sergio Ramos-ten contract thar an la ziak duh rih lo a, Marcelo chu season tawpa chhuak tura sawi a ni bawk.

Player chhuak tura sawite hi an chhuak vek a nih ngat chuan Madrid fan-te tan an 'hero' ten Real jersey an ha lai an en tawpna ber a ni thei a, Zidane hi a chhuak leh a nih ngat chuan a kir leh kherin a rinawm tawh lo bawk.

Hetihlai hian tun hnaia hliam vanga talbuai ngun tak Ramos-a'n zaninah Villarreal-a hmachhawn thei lo mai thei a, a inlan thei a nih pawhin bench aṭanga bul a ṭan a rinawm zawk. Ferland Mendy, Dani Carvajal leh Lucas Vazquez chu hliam vanga inlan lo tur chiang an ni a, Varane erawh Zidane-a'n a duh phawt chuan bul a ṭantir thei ang.

A hming Benzema
Real-in Karim Benzema an neih avangin goal khung kawngah harsatna an nei lo a, kum ruk dawn hnua France tana inlan tura koh thar striker hian a season duhawm ber pawl a hmang mek.

Kum 33 mi striker hian tun season inelna hrang hrangah match 45 khelin goal 29-a khung a, assist vawi riat a nei bawk - Yellow Submarine tan ven bik a sual lo ang. Emery enkawl team hian hliam vangin Samuel Chukwueze, Juan Foyth leh Vicente Iborra an chhawr thei dawn lo tih loh chu buaina an nei lo a, Spanish coach-in duhthlan tur a nei ṭha.

Villarreal hian midfielder Dani Parejo, defender Pau Torres, forward Paco Alcácer leh forward Gerard Moreno-te ho an nei tih hriat a ṭha - Moreno hian tun season inelna hrang hranga match 44-a khelh aṭangin goal 29-a khung a, assist vawi 10 a nei bawk.

Inkhel chhehvel
→ Atletico Madrid-in Valladolid an hneh chuan Real Madrid result-in awmzia a nei dawn lo a, Atletico an champion ang.
→ Atletico Madrid tlawm se, Real Madrid tlawm bawk se, Atletico-in point hniha hma an hruai mek avangin Diego Simeone-a naute hi an champion ang.
→ Atletico Madrid an tlawm a, Real an chak chuan Zinedine Zidane-a naute an champion ang.
→ Atletico-in Valladolid inhnehtawkpui se, Real-in Villarreal hneh se, team pahnih hi an point hmuh zat a inang chiah ang.
→ La Liga-ah goal difference aiah head-to-head chu en hmasak ṭhin a ni a, point hmuh zat a inang a nih chuan head-to-head a result nei ṭha zawk Real Madrid chu champion tur an ni.