Barca aia ngaihven hlawh Messi

La Liga-ah match hnih chiah khelh tur a la awm tih thleng kha chuan Barcelona-in champion beiseina an la nei ve a, mahse, an elpui Atletico Madrid leh Real Madrid an chak laia an tlawm bik avangin zanin an inkhel turin awmzia a nei tawh lo.

Barca hian zanin dar 9:30-ah tun season-a an match tawp ber ni turin Eibar an lenchilh dawn a, an hmachhawn tur team hi La Liga aṭanga tla chiang tawh an nih bawk avangin an inkhel tur boruak a 'hot' lem lo hle.

Catalan club inkhel tur aiin season tawp ruala Lionel Messi-a chhuah dawn leh dawn loh chu sawi hlawh zawk a ni mek a, Manchester City hming chu ri ring ber a ni mek.

Khawthlang media-ten an tarlan danin City hi Messi lalut tur chuan chhiah tel loin kar khata £500,000 hlawhtir an inhuam a ngai, tiin hrilh an ni a, kum khat contract an pek a ngai bawk ang - hei erawh thuthang mai a ni.

Hetihlai hian Spanish chanchinbu lar Marca chuan Messi hian a hma hun a tichiang thuai dawn tih an sawi a, Argentine forward hian an ram chanchinbu lar 'Ole' nen an inkawm hunah a hma hun a sawi chiang dawn.

Barcelona president Joan Laporta chuan Messi hi a titipui tawh a, Catalan club-ah a cham a nih chuan team ṭha tak a dinpui tur thu a hrilh.

March thlaa Barca President atana thlan thar Laporta-a'n President dinhmun a luah leh theih chhan hi a campaign au hlaa Messi-a chelh tur thu uar taka a sawi vang a ni a, a chelh thei lo a nih ngat chuan Barca fans thinrimna tawng tura a inbuatsaih a ngai ang.

Kum 33 mi ni tawh mah se Messi hian tun season inelna hrang hrangah match 47 khelin goal 38-a khung a, assist vawi 14 a la nei thei bawk.