Bayern Munich nomawi chawi zan; Flick-a thlahna leh Lewy record?

22nd May, 2021

Bayern Munich-in zanin dar 7:00 hian Allianz Arena-ah Augsburg an mikhual dawn a, eng result pawh thleng se inkhelh zawhah nomawi an chawi dawn.

Flick-a thlahna
Season khat leh a chanve hnu lekah Hansi Flick-a'n Bayern a chhuahsan dawn mah se nomawi a chawi tam avangin German manager hian awmze nei taka thlah a phu.

Bayern hian December 22, 2019 khan Niko Kovac an ban a, team enkawl lailawk turin Flick an ruat. Kum 56 mi Flick hi beisei phak bakin a che ṭha a, season chanve chhung lekin Champions League, Bundesliga leh DFB-Pokal te a champion pui nghal.

Tun season-ah Flick hian Bavarians hi DFL-Supercup, UEFA Super Cup leh FIFA Club World Cup-ah nomawi a chawipui leh a, DFB Pokal leh Champions League-ah vanduai mah se Bundesliga nomawi a humhim bawk.

Flick hian Bayern hi nomawi pasarih a chawi pui a, a hmunruak zau tak hi Julian Nagelsmann tan pawh hnawhkhah a huphurhawm dawn. A sulhnu thlir hian Flick-a club legend zingah a tel pha a, thlahna ropui tak a phu a ni.

Lewy leh record
Robert Lewandowski-a'n tun season Bundesliga-ah goal 40 a khung tling tawh a, Bayern Munich legend Gerd Muller-a record a nih rual. Polish striker hian record siam turin goal khat dang a la mamawh.

Tun hnai bik thlirin Europe inelna sangah Lionel Messi (vawi 3), Cristiano Ronaldo (3) leh Luis Suarez (1) ten league-ah goal 40 an khung thei a, mahse Lewy erawh Bundesliga player a ni a, season khatah match 38 ni loin match 34 chauh a awm avangin a record hi a ropui hle.

Arsi panga
Bayern Munich-in a vawi 30 nan Bundesliga nomawi an chawi dawn a, an kawr hmaah arsi panga an dah tawh dawn.

Bavarians hian nomawi pathum an dah khan arsi pakhat an dah a, nomawi panga (arsi pahnih), nomawi 10 (arsi pathum), nomawi 20 (arsi pali) leh nomawi 30 (arsi panga) an chawiin an arsi dah zat hi an pung chho zel a ni.