Zaninah Premier League khel tur zawnna

Championship aṭanga Premier League kai tur zawnna Playoff semifinal second leg chu zaninah khelh a ni dawn a, Wembley Stadium pan thei tur a hriat dawn.

Tlai dar 5:00-ah Brentford-in Bournemouth an mikhual dawn a, first leg-ah Cherries 1-0 a an chak avangin Bees (Brentford sawina) hmabak a harsa dawn. Zanin dar 11:00-ah Swansea leh Barnsley te an inkhel dawn a, first leg-ah Welsh club hi 1-0 in an chak.

Vanduai nawn?
Season liam ta khan Brentford-in season ṭha tak an hmang a, amaherawhchu season tawp lama an chetsual avangin playoff an khelh a ngaih phah. League-ah pathumna an ni a, playoff semifinal-ah parukna Swansea City hneh mah se final-ah Fulham an hneh lo.

Tun season-ah Bees an la che ṭha tho a, champion Norwich City leh pahnihna Watford te erawh an khan lo deuh. Chutihrualin pathumna an nih miau avangin playoff aṭanga tling tura rinkai ber an ni.

Amaherawhchu first leg-ah Bournemouth-in Arnaut Danjuma goal hmangin an khung a, 1-0 a an chak avangin tunah chuan Cherries dinhmun a ṭha tawh zawk. Bournemouth hi Premier League khel tura an inpetling thei a nih chuan season liam taa relegate-te bawk kha an kir chho leh dawn tihna a ni ang.

Chutihrualin season liam ta playoff first leg-ah Brentford hi 1-0 chak lo mah se second leg-a an muala an khelh ṭumin 3-1 in a chak. Tun ṭumah pawh hian thawhchhuah leh ngei an tum dawn a, an chak zo ta lo a nih erawh chuan an vanduai nawn a tih theih ang.

Swans dinhmun a ṭha
Swansea-in khualmualah Andre Ayew-a goal hmangin Barnsley 1-0 in an hneh a, an mual Liberty Stadium-ah an tlawm lo a nih chuan Wembley Stadium-ah a inlan thei dawn.

Season liam ta khan playoff semifinal-ah Brentford an hneh lo a, first leg-a 1-0 a an hmahruaina an hum thei lo. Tun season-ah erawh thleng nawn tawh lo turin ṭan an la ang.