France - Ligue 1 PSG leh Lille ten nomawi an inchuh

Season dang ang chu ni se, league match hnuhnung ber an khelh hmain Ligue 1 nomawi chu Paris Saint-Germain kutah a awm daih tawh ang. Season kal lai erawh a thawnthu a danglam–PSG hian an nomawi humhim tur chuan club dang puihna an mamawh ta.

Parthianni zan dar 12:30 hian Ligue 1 club zawng zawng an inlan dawn. Hmahruaitu Lille tan champion turin Angers hneh a tawk a, midang result ngaihchan tel a ngai lo–an chak lo a, an elpui PSG an chak a nih erawh chuan a tawp nia lungngai zawk an la ni thei.

PSG chu Brest mualah an lenglut ve thung dawn a, Paris club hmachhawn tur hi tla thei zinga mi an la nih avangin thih thain mikhual an lo thleng dawn tih a chiang. Champion tum leh tlak hlau inkhel hi a hmuhnawm ang.

Hna hlen a ngai
Mauricio Pochettino kaihhruaina hnuaiah PSG hian Super Cup leh French Cup an la tawh a, an elpui club dangte nena khaikhin chuan season chhia a ni lo. Mahse, an thil tum leh player hlawh atana an sum hman chhut chuan Ligue 1 title tal an la mamawh belh.

Champions League chu sawi theih an nei tawh lo. League title pawh an hloh a nih chuan Paris club tan season chhia tia sawi theih a ni dawn, midang result ngaihchan tel an ngaih bawk avangin Poch tan ngaihtuah tur a tam viau ang tih a hriat.

PSG thiampuipa Kylian Mbappe erawhin beisei a la nei a, an hmabaka tih tur awm chu ṭha taka hlen chhuah an tum thu a sawi. Mbappe chuan, "Inelna pakhat chauh kan hmachhawn lo, French Cup kan chawi kha league match hnuhnung ber atana inbuatsaihna a ni," a ti.

Argentine manager Poch chuan, "Kan tih theih hmasa chu Brest laka theihtawp chhuah a ni. Chumi bakah chuan Agere-in Lille min hnehsak kan beisei, rilru puitling leh fim tak chungin inelna kan hmachhawn ang," tiin a sawi ve bawk.

Rinkai Lille
Season tir lama PSG chet fuh loh leh team ṭha ni chunga point an hloh fo dan chu hriatsa a ni. Hetihrual hian Christophe Galtier kaihhruaina hnuaia Lille khelh chhoh dan hi sawinep a, sawi ropui loh luih tum chi pawh a ni chuang lo.

Kum 2013 hnu lamah AS Manaco-in Ligue 1 title vawi khat an la ve zeuh tih loh chu PSG kutah a lut vek. Paris club hian kuminah title la leh se la chuan champion hnem ber Marseille (10 titles) leh Saint-Etienne te an nihrual ang.

Rinkai lo ni chunga bul ṭantu Lille hi tunah chuan a fawng chelhtu an ni ta zawk a, 2011 hnua an league nomawi hmasa ber la turin vawi khat chak a tawk. Galtier chuan, "Kan tum ram kan thlen hma chuan chawlh a thiang lo, a tawp thlengin kan bei dawn.

"Ka naute hian an kutah eng nge innghat tih an hria, kan khingpui leh club dang aṭanga kan dinhmun ti hniam thei zawng zawng chu paihbo kan tum ang," a ti. Lille hian April thla khan an elpui PSG hi Paris khawpuiah 1-0 in an hneh a, an champion a nih chuan vanneih vang ni loin an phu vang a ni ang.