Premier League top scorer - Harry Kane nge Mohamed Salah?

Premier League-ah match khat chauh khelh tur a awm tawh a, top scorer tur a la chiang lo. Tottenham striker Harry Kane-a'n goal 22 a khung tawh a, Liverpool forward Mohamed Salah nen an khung zat a inang. Pathianni zan dar 8:30-ah Liverpool-in Crystal Palace an mikhual ang a, Tottenham-in King Power Stadium-ah Leicester City an hmachhawn thung ang.

Fixtures aṭanga thlir chuan Salah dinhmun a ṭha a, inkhel entu an awm avangin Anfield boruak a dang dawn. Egyptian Messi an tih mai Salah hi Palace tlarhnung tan ven a harsa ang. Spurs hmachhawn tur Leicester City erawh Champions League khelh ngei tum an ni a, tun season tawpa tum châkawm loh ber zinga mi an ni. Hemi a nih avang hian Harry Kane-a hna a hautak phah ang.

Salah a ropui
Mohamed Salah ropuina an sawi vul tawk lohna chhan hi chu amah vang tho a ni a, 2017-18 season khan goal 32 tehmeuh a khung. Hemi hnu hian Salah chet ṭhat leh ṭhat loh teh nan goal 32 hi loh theih lohin hman chhoh a ni a, khum a harsa tawh em a ni.

Amahrawhchu season tina Salah chet dan thlir erawh chuan a ropui tih erawh hmuh hmaih chi rual a ni lo. Goal 32 a khung zawh season-ah goal 22 a khung a, Premier League top scorer a ni. 2018-19 season hian Sadio Mané leh Pierre-Emerick Aubameyang ten goal 22 ve ve an khung bawk avangin top scorer pathum an awm.

Salah goal khung ang zat bawk hi a khelhpui Mane-a'n a khung a, tlarhnungah Virgil van Dijk a chet ṭhat bawk avangin Egyptian forward hian a phu ang tawk fakna a dawng lo. A chhan bulpui chu goal 32 aṭanga teh a la ni miau.

Season liam ta khan Liverpool-in Premier League nomawi an chawi a, Salah-a'n goal 19 a khung. Egyptian forward hian goal khung tam lamah Jamie Vardy, Aubameyang leh Danny Ings te a tluk loh avangin Liverpool tana goal khung tam ber ni siin fak a hlawh lo. League nomawi an chawi theih chhanah Van Dijk hming a langsar a, Salah faka a ri ring tawk lo.

Mahse maw, kan hriat reng tur chu Salah hi kum zawnin top scorer a ni a, striker ni si loin season li chhung top scorer ni thei dinhmunah a ding vek. A ropui zia hi sawi nep theih a ni lo.

Kane ve thung hi...?
Harry Kane hian nomawi la pet chhuak lo mah se goal a khung tam miau fak loh theih loh a ni. 2014–15 season khan goal 21 khungin khawvel hriat a hlawh ṭan a, season khat lek che ṭha a, che chhe zui tura ngaitu an tam hle.

Amaherawhchu Kane hian amah seltute ka hup nan 2015–16 season-ah goal 25 khungin top scorer a ni a, 2016-17 season-ah goal 29 khungin top scorer a ni nawn. English striker hi sawi nep theih a ni lo.

2017-18 season-ah erawh Salah chet ṭhat ṭum a tawng a, goal 30 khungin season khata a goal khung tam ber ṭum ni mah se Salah (32) a pha lo. Hliam vangin Harry Kane-a'n season hnuhnung pahnihah match 30 a khel tling lo ve ve a, chutichung chuan goal 17 leh 18 a khung.

Kane hian match 30 a khelh tlin chuan goal 20 a khung tling ziah a, hei hian striker ṭha bik a nihzia a pholang. Chutihrualin kum 27 mi a nih tawh avangin nomawi a duh a, Tottenham chhuahsanin club lian zawk pan a duh niin a lang.

Spurs striker Kane chuan, "Chairman (Daniel Levy) nen inpawh taka thusawi dun ka duh a, a rilru puthmang tak tak min hrilh se ka duh. Kum hnih thum hnuah chuan ka hlutna hi a ngai reng dawn lo. Club-in pound maktaduai 100 an neih theihna tur a nih chuan min hralh a hnial lo maithei. Kei chuan ka career thlirleta inchhirna tur neih ka duh lo," tiin a sawi a, nomawi chawi loa awm reng a duh loah a ngaih theih.

Tun nipui transfer-ah Kane hming a ri ring dawn a, a vawi thum nana Premier League top scorer a nih ngat chuan a man a to leh sawt ang. English striker hian kum 2024 thleng Spurs-ah hian contract a la nei a, lei chhuak tur chuan sum thehchhuah tam a ṭul dawn a ni.