Serie A Engkim chinfel a ni dawn ta
Tun season atan Italian champion a chiang tawh a, inelna hniam zawka tla tur pathum an chiang tawh bawk. Tunkar tawp hian Serie A hmawr an bawk dawn - season thara Champions League khel tur team pahnih tih chian a ni ang.
Champion Inter Milan leh pahnihna ni mek Atalanta te chu a sang pali zingah an awm chiang tawh. AC Milan, Napoli leh Juventus ten hmunruak dang pahnih la awm an inchuh dawn - Milan leh Atalanta an khel dawn a, boruak a 'hot' hle ang tih a chiang.
Antonio Conte enkawl Inter hian 2010 hnua an league title hmasa ber an hlawh chhuak fel tawh a, Pathianni zana Udinese an hmachhawn hunah nomawi an chawi ang. San Siro-ah hian a hmuna entu 1000 an awm thei dawn.
Palina inchuh
Pahnihna Atalanta hian match 37 aṭangin point 78 an nei, pangana Juventus tan an point hmu zat hi la hmuh theih a ni. Mahse, Atalanta hian Old Lady lakah head-to-head an neih ṭhat zawk avangin an lehpel thei tawh lo.
AC Milan leh Napoli ten point 76 ve ve an nei a, Pathianni zana an khingpui an hneh chuan UCL khel turin an tling ang - an hma hun chu an kutah a innghat tihna a ni a, chutih rualin an khingpui tur hi Atalanta leh Hellas Verona an nih avangin chesual thei an ni.
Juventus tan Bologna lakah chak ngei ngei a ngai, chak loh chuan kawng dang a awm tawh lo. Andrea Pirlo naute hi a chak a nih pawhin Milan emaw Napoli emaw zawkin point an hloh a ngai tel tawh a, midang inkhel result-in an hma hun a hril dawn.
Pirlo beiseina
Tawnhriat nei lo chungin Juventus a enkawl a, tluk leh din fawmin a kal. Harsa takin Coppa Italian nomawi an chawi a, cup a lak hnuah Pirlo chuan Turin club enkawl chhunzawm zel a duh thu a sawi.
Pirlo chuan, "Cup chawi khan kan harsatna leh buaina a chingfel vek lem lo, zirlai tam tak erawh ka zir chhuak. Pathianni zana kan inkhel boruak hian kan hma hun chu a hril ang. Kan kutah a innghat vek lo a, midang kan ngaihchan tel a ngai dawn," a ti.
Juventus thuneitu lam chuan Pirlo chungah rinna an nghah thu an sawi fo a, amaherawhchu Champions League an khel phak lo a nih ngat chuan an rilru a la danglam thei reng - player lakluh leh neihsa chelh thlengin a harsat phah ang.
Tun hnaiah Cristiano Ronaldo-a'n Turin khawpui aṭangin a car manto ṭhenkhat a phur chhuak a, tun hmain Madrid khawpui aṭangin hetiang hian a lo che tawh. Tunah club dinhmun a ṭha tawk lo a, chona thar hmachhawn a duh nia ngai an tam.
Juve hian Ronaldo kawl chhunzawm an duh a nih chuan UCL khelh phak a pawimawh dawn, inelna sang an khel lo a nih chuan Ronaldo hma hun ngaihtuah chhunzawm a ngai ang - Pirlo nauten an tih theih hmasa chu chiang taka Bologna hneh phawt a ni.
Milan an chiang lo
Season bul an ṭan fuh a, kumin tir lamah pawh khan Serie A hmahruaitu an la ni zak zak. Mahse, hun pawimawh laiah an zuih avangin AC Milan dinhmun a ṭha ta lo, zanina an hmachhawn tur Atalanta hian an hlahthlem ngawt lo ang tih a hriat theih.
Gian Piero Gasperini enkawl Atalanta hian season thum chhung chu Serie A goal khung hnem ber dinhmun an luah a, Milan an hneh leh a nih chuan Italian football inelna sanga an chak hnem ber season an hmang dawn a, an point hmuh hnem ber ṭum a ni bawk ang.
Gasperini chuan, "Pahnihna nih ngei kan tum, chumi tur chuan point hmuh a ngai dawn. Kan tur hi kan la thleng lo, a sang thei ang ber thlen kan tum tur a ni ang," tiin a sawi a, a thusawi hi Milan tan chuan hriat a nuam lo ang.
Milan hian Atalanta nen league match an khelh hnuhnung 11-ah ṭum khat chiah hnehna an chang thei a, an hna a hautak dawn takzet. Milan manager Stefano Pioli chuan, "Tih theih loh anga ngaih kan lo ti fo tawh, tunah chuan chutiang chu kan beisei ang," a ti.
Milan hian hliam vangin Zlatan Ibrahimovic an chhawr thei dawn lo. Swede striker awm lo hi inkhel boruak sangah chuan a pawi zual ṭhin. Ibra a awm loh chuan Ante Rebic chungah mawhphurhna a sang dawn, Croatian winger hian Torino laka goal thum a khung theih avangin inrintawkna a nei sang ang.
Italy - Serie A
Zanin Inkhel Tur
Crotone 12:15 AM Fiorentina
Cagliari 12:15 AM Genoa
Sampdoria 12:15 AM Parma
May 23, Pathianni
Inter Milan 6:30 PM Udinese
Torino 12:15 AM Benevento
Bologna 12:15 AM Juventus
Sassuolo 12:15 AM Lazio
Atalanta 12:15 AM AC Milan
Spezia 12:15 AM AS Roma
Napoli 12:15 AM Hellas Verona