Bundesliga aṭangin tute nge relegate dawn?

Germany-a football inelna sang ber Bundesliga hmawr bawkna chu zanin hian neih a ni dawn. Ṭum dang ang bawkin Bayern Munich-in inelna an thunun a, champion tur a chiang tawh. Chutihrualin Europa Conference League khel tur leh relegate tur a la chian loh avangin ngaihnawm tur a la awm.

Relegate tur?
Bundesliga-ah hian team 18 an awm a, team hnih an rele­gate dawn a, team khat dangin rele­gation playoff an khel dawn. Schalke-in point 16 chauh an la hmu a, 2. Bundesliga-ah an tla tawh.

Hmunruak pakhat hi Arminia Bielefeld, Werder Bremen leh FC Cologne ten pumpelh an tum dawn. Zanin hian a rual vekin an khel dawn a, zan dar 7:00-ah an inkhel ṭan ang. FC Cologne hian an match hnuhnung berah Schalke an hmachhawn dawn a, chak tur zawka ngaih ni mah se Bundesliga khel zel tur chuan club dang result-ah an innghat.

Cologne dinhmun ṭhatna erawh an chung chiaha awm Werder Bremen-in season thara Europa Conference League khelh tum Borussia Monchengladbach an hmachawn dawn. Bremen-in point an hloh a, Cologne an chak chuan Bremen hi tla tur zawk chu an ni.

Arminia Bielefeld dinhmun a ṭha bik lo, club dang result-a innghat lo tur chuan VfB Stuttgart an hneh ngei a ṭul dawn. Point khat chauh an hlawh chhuak emaw an chak lo emaw a nih chuan relegate nghal thei an la ni.

Bundesliga-ah hian 16-naa awmin 2. Bundesliga-a pathumna nen relegation playoff an khel dawn. Tun dinhmunah VfL Bochum, Holstein Kiel leh Greuther Furth te chu tling nghal thei vek an nih rualin playoff khel thei vek an ni. Chumi awmzia chu team pathumte hi an ṭha vek tihna a ni a, playoff khelh pawh a châkawm loh. Bielefeld, Bremen leh Cologne ten relegate pumpelh turin 15-na nih an tum ang.

Europe-a inlan tur
Bundesliga aṭangin Bayern Munich, RB Leipzig, Borussia Dortmund leh VfL Wolfsburg ten season tharah Champions League an khel dawn. Europa League khel tur pawh a chiang tawh a, Eintracht Frankfurt leh Bayer Leverkusen ten an khel ang.

Europa Conference League khel tur hmunruak pakhat chiah a awl tawh. Pasarihna dinhmun hauhtu Union Berlin-in pahnihnaa awm RB Leipzig an hneh chuan Conference League hmasa berah hian an inlan ang.

Chutihrualin Borussia M'Gladbach, VfB Stuttgart leh SC Freiburg ten beisei an la nei vek a, Union Berlin hian point thum an hmuh a beiseiawm loh avangin Conference League inchuh boruak hi a la sang khawp ang.