Portugal-in Euro khel tur an puang, an ṭha!

European Championship champion lai Portugal-in Euro 2020 khel tur player 26 hming an tar chhuak a, nomawi humhim turin a ṭha tawk. Ṭum dangah chuan Cristiano Ronaldo hming a lang­sar fal ṭhin a, tun ṭumah erawh position tinah player ṭha bik an awm vek.

Record thar?
Kum 36 mi Ronaldo hian ram tan goal 103 a khung tawh a, ram tana goal khung tam kawngah Iran legend Ali Daei chiah a pha tawh lo. Bayern Munich leh Hertha Berlin tan pawha khel tawh Ali Daei hian goal 109 a khung a, Ronaldo tan Euro inelna chhung ngeia record khum tur chuan Portugal an thlen thui a ṭul dawn.

Chutihrualin Portugal captain Ronaldo hi a rilru puthmang thlirin record ringawta lawm tur chi a ni lo a, cham­pion nomawi chawi ngei a tum ang.

Player ṭha dang
Goalkeeper-ah Rui Patricio an nei a, Wolves keeper hi penalty dang thei keeper a nih avangin knockout inelnaah chuan keeper ṭha tih theih tur zinga mi a ni.

Tlarhnungah Man City innghahna Ruben Dias an nei a, hei ringawt pawh hi inchhuanna tham a tling. Dias kawppui turin Lille innghahna José Fonte a awm a, ani hian Ligue 1-ah a club a champion pui a nih chuan inrintawkna a ngah khawp ang.

Mamawh huna chhawr mai theh turin tawnhriat nei defender Pepe a awm a, wing back-ah Joao Cancelo, Nuno Mendes leh Raphael Guerreiro te an la awm cheu.

Tlarhnung hi an ṭhatna a la ni lo zawk. Midfield-ah Manchester khaw club chhuanvawr Bruno Fernandes leh Bernardo Silva te an awm a, goal khungtu lamah Ronaldo thlawp turin Diogo Jota leh Joao Felix te an la awm.

Lille-a harhtharna chang mek Renato Sanches bakah Wolves player Rúben Neves leh Joao Moutinho te pawh chhawr tlak an ni a, an player neih dan thlirin champion rinkai chu an ni chiang a ni.

Portugal Squad
Goalkeepers: Anthony Lopes (Lyon), Rui Patrício (Wolves), Rui Silva (Granada)

Defenders: João Cancelo (Manchester City), Nélson Semedo (Wolves), José Fonte (LOSC Lille), Pepe (Porto), Rúben Dias (Manchester City), Nuno Mendes (Sporting CP), Raphael Guerreiro (Dortmund)

Midfielders: Danilo Pereira (Paris), João Palhinha (Sporting CP), Rúben Neves (Wolves), Bruno Fernandes (Manchester United), João Moutinho (Wolves), Renato Sanches (LOSC Lille), Sérgio Oliveira (Porto), William Carvalho (Real Betis)

Forwards: Pedro Gonçalves (Sporting CP), André Silva (Eintracht Frankfurt), Bernardo Silva (Manchester City), Cristiano Ronaldo (Juventus), Diogo Jota (Liverpool), Gonçalo Guedes (Valencia), João Félix (Atlético Madrid), Rafa Silva (Benfica)