A vawi khat nan Leicester-in FA Cup an chawi

Thomas Tuchel hnuaiah Chelsea-in nomawi an chawi dawn ngeiin a lang hman a, amaherawhchu Brendan Rodgers leh a hoten tum dan dang an nei. Inrinni zan khan Leicester City-in Youri Tielemans goal ropui hmangin Chelsea 1-0 in an hneh.

Foxes chu a vawi khat nan FA Cup-ah an champion a, Wembley Stadium-a inkhel entu 21,000 hmaah nomawi an chawi a, Covid-19 vanga lockdown hnua England-a inkhel entu tam ber ṭum a ni.

Champion duha tuihal
FA Cup final-ah Champions League final khel tur Chelsea chu chak ngei tura rinkai an ni a, amaherawhchu final a nih tawh miau avangin engmah a chiang lo.

Thomas Tuchel-a'n FA Cup-a inlan tamte a duhsak chhunzawm a, a sawi lawk ang chiahin Edouard Mendy aiah Kepa Arrizabalaga a thlang. Chutihrualin Ben Chilwell, Kai Havertz leh Christian Pulisic te bench-ah a ṭhuttir tel a, Premier League-a match pawimawh an khelh ve reng avangin German manager hian a duh ang thalin player a thlang lo tih a hriat theih.

Brendan Rodgers erawhin hun ṭha bawhpelh a duh lo a, damkawr chungin defender Jonny Evans a luhtir hial. Nomawi chawi duhin Foxes an tui hal a, hei tak hi final-a team pahnih danglamna a ni.

Goal khat a tawk
Chelsea-in inkhel thunun zawk mah se tlarhmaah pet goal thei an nei lo a, Timo Werner-a'n chance ṭha a hlah leh ṭhin avangin manager Tuchel leh Blues ṭantute mit tikhamtu a ni.

Beisei angin first half-a hmuhnawm tawk lo a, second half erawh inkhel dang daih a ni a, FA Cup hlut bikna pholanin a awm. Minute 63-naah Youri Tielemans-a'n yard 25 aṭangin goal kilah a pet lut a, Foxes ṭantute thawm a ring hle.

Goal luh theihna tur hian ball-in Foxes midfielder Ayoze Perez a kut a per avangin Chelsea player-te an thinur thung. Tuchel-a'n goal duhin Chilwell, Pulisic leh Havertz te a luhtir ve nghal a, Chelsea goal bawh a na lehzual.

Amaherawhchu Chelsea an vannei tawk lo a, N'Golo Kante-a'n team ṭha ngam viau mah se 'killer pass' a neih loh avangin anni aia team nem lakah danglamna thlen a harsat. Foxes captain Kasper-a'n Chilwell-a ball tauh leh Mason Mount-a ball pet ṭha zetin a dang.

Hun tawp hma hretin Chilwell thawhṭhat zarah Wesley Morgan-a'n an lamah a tilut a, Chelsea-in an goal khung lawm viau hman mah se VAR hmanga enlet a nih hnuah English defender hi a offside a, Blues-in siphurhna goal an khung thei ta lo.

A ropui e
Leicester manager Brendan Rodgers chuan, "Club tan mellung pawimawh kan phun a, FA Cup-a kan vawi khat champion-na a nih avangin kan tan chuan a hlu hle. Player-te ka lawmpui a, a bik takin Khun Top (Club chairman Aiyawatt an koh dan) leh a chhungkua ka lawmpui. FA Cup champion hi an duhthusam a ni a, a ropui e," tiin a sawi.

Chelsea boss Thomas Tuchel chuan, "Player-ten handball-ah an ngai nghal a, match zawnin VAR kan lamah a ṭang lo. Arsenal lakah khan goalline bula handball chu ham a ni lo a, tun ṭuma handball pawh hi inkhel tidanglamtu tho a ni. Tunah chuan handball dan hi ka hrethiam tawh lo. Chutihrualin handball kha ham ta se kan champion dawn tihna a ni lo," tiin an chak loh chhanah VAR a puh.

Tuchel-a hnuaiah Chelsea che ṭha viau mah se Premier League-ah a sang pali zinga an awm lo a, Champions League-a Manchester City an hneh loh bawk chuan season naran tak a ni ang.

FA Cup final
Chelsea 0 - 1 Leicester City
LFC : Youri Tielemans 63'

Ngaihnawm
◆ FA Cup final-ah entu mi 21,000 an awm a, final hmuhnawmna a belhchhah hle.
◆ Leicester City-in final vawi nga an luhnaah an champion a, FA Cup nomawi chawi thei club 44-na an ni.
◆ Chelsea hi Newcastle United (1997-98 leh 1998-99) hnua kum zawna final-a chak lo hmasa ber an ni a, season liam ta khan final-ah Arsenal an hneh lo.
◆ Leicester manager Brendan Rodgers chu Sir Alex Ferguson-a hnua English leh Scottish FA Cup champion thei hmasa ber a ni.
◆ Leicester midfielder Youri Tielemans chu Belgian player zinga FA Cup final-a goal khung thei pathumna a ni a; final-a goal khungtu dang pahnih Eden Hazard (2018) leh Kevin de Bruyne (2019) te nen nomawi an chawi vek bawk.
◆ Leicester keeper Kasper Schmeichel chu David Seaman (Arsenal, 2003) hnua nomawi chawi thei captain hmasa ber a ni.
◆ Chelsea striker Olivier Giroud-a'n FA Cup final vawi ruk a khelhna a ni a, indopui II-na hnua Ashley Cole (8), Ryan Giggs (7) leh Roy Keane (7) te chauh amah aia FA Cup final khel tam an awm.
◆ Leicester defender Wes Morgan (Kum 37 leh ni 114) chu outfield player zingah Teddy Sheringham, West Ham (2006, kum 40 leh ni 41) hnua final-a inlan thei upa ber a ni.

Leicester mipui ngainat Vichai te chhungkua
Premier League club lian Manchester United leh Arsenal ṭantute an club neitu duh loa uar taka lungawi lohna an lantir laiin Leicester City ṭantute leh player-te chuan an club neitu Apichet Srivaddhanaprabha an kuah a, FA Cup nomawi chawitu atan an hmang.

Leicester hian FA champion an nih hi club neitu kum 2018-a thi Vichai Srivaddhanaprabha tan an hlan. Foxes captain Kasper Schmeichel chuan tuna club chairman Apichet chu a ṭhutna aṭangin khelmualah a hruai thla. Brendan Rodgers leh a player-ten an chet dan hmangin Apichet chungah an lungawi tih a lantir a, tun dinhmun an thlen theihna chhan Vichai an theihnghilh lo. Wembley Stadium-ah Vichai-a thlalak chuanna banner lian ṭha tak chu phochhuah a ni a, a thusawi, "Kan duhthusam a thleng ṭhin, puitlin tura huaisen taka kan hmachhuan chuan," tih chu a inziak.

Thawnthu hlui
Leicester City neitu, sumdawng hausa Vichai Srivaddhanaprabha chuan October 27, 2018 khan a chuanna helicopter chesual avangin a nunna a chan a, football khawvel rohlu pakhat chu a her liam. October 27, 2018 zan hian Leicester hian an mikhual West Ham chu goal khat ve ve khungin an inhnehtawkpui a, Srivaddhanaprabha chuan inkhel hi a hmunah a en. Ṭum danga a tih ṭhin dan angin inkhelh zawhah helicopter-in a chenna London lam a pan a, mahse second rei lote hnuah helicopter-ah chiang lo a awm a, club staff-te lirthei dahna hmunah a chesual zui.

Leicester City-in Srivaddhanaprabha chungchangah thuchhuah an siam lawk lo a, thuchhuah an siam hmasak ber erawh a thih thu a ni - football khawvel a ngui a, hmun hrang hrang aṭanin Vichai uina thuin Leicester a thleng. Media ṭhenkhat tarlan danin tun ṭuma captain Kasper hian tih theih a neih beiseiin helicopter chetsualna lamah a tlan phei hial a, hei hian player leh club neitu inkar boruak a pholang chiang hle.

Pa 'zakzum'
Vichai Srivaddhanaprabha hian mize danglam tak a nei a, chu a mizia pakhat chu 'media a hmachhawn tam ngai lo' kha a ni a, a chawr chhuahna Thailand-ah meuh pawh a nazawnga media hmachhawn a duh lo.
Hei vang tak hian Leicester City neitu meuh ni siin hriat a hlawh tawk lo a, mipui vantlang hmuha langsar taka in pholan ai chuan a nun chu 'private' taka hman duh mi a ni.

BBC South East Asia correspondent Jonathan Head chuan, "Interview hmachhawn hi a duh meuh lo a, hei vang hian amah hriat chian chu thil harsa tak a ni," a ti. Vichai hian hmingṭhatna a neih langsar tak erawh mi chanhai leh ṭanpui ngai zawkte tana a sum a ui ngai lo hi a ni. Leicester khawpuia hospital leh naupang enkawlna hmunah te sum tam tak a pe a, mi harsa zawkte khai chhuak turin a sum a ui ngai lo.

Leicester ropuina Vichai
King Power International Group chairman leh neitu ni bawk Vichai hian kum 2010 khan Foxes hi pound maktaduai 39-in a lei a, leiba an neih zawng zawng a rulhsak bawk. Foxes-in hma a sawn theih nan sum tam tak a seng a, kum li hnuah Premier League khel turin a hruai kir leh thei. Kum 2014-a top flight football an khelh dawn hian Vichai chuan, "Kum thum chhunga top five team nih kan tum," a ti.

Vichai hian a thil tum hlawhtlin tir tumin tawnhriat ngah Claudio Ranieri chu Foxes enkawl turin a lalut a, club head of recruitment Steve Walsh chungah rinna nghatin a tisual lo hle bawk. 2015-16-season a thlen meuh chuan Leicester neitupain a beisei aia hmain hlawhtlinna a chhar a, infiamna chanchina thil thleng ropui ber ang hiala chhal ngam thlengin Leicester City chu Premier League champion an ni.

Fan-te ngainat
Vichai-a'n Leicester neitu a nih chhunga a sulhnu hnutchhiah pakhat chu fan-te nena an inngaina em em mai kha a ni a, a piancham lawmna pawh fan-te nen an nei ṭhin. Pound tluklehdingawn 2.9 ngawt sum nei nia an sawi Vichai hian a pianchamah chuan inkhel entu fan-te zingah a thlawnin cake a sem ṭhin a, in tur leisakin a sem a, khualmuala an team zuitu fan-te chu zing chaw a leisak a, scarve a pe ṭhin bawk.

Leicester City Supporters Club chairman Cliff Ginetta chuan, "Vichai chhungkua hi Leicester mipuite zingah chuan an tla na em em a, he club leh khawpui tana an hnathawh zawng zawng avang hian lawm an hlawh em em mai a ni. Khawvel hriatah Leicester an pho chhuak a, club tan sum tam tak sengin damdawi In leh naupang enkawlna hmunah te pawisa an thawh a, Krismas-ah ni se, fan-te tan eitur tuihnai tak tak a thlawnin an sem ṭhin," a ti a, Vichai a ui hle.

Vichai te chhungkaw zarah Foxes-in Premier League leh FA Cup nomawi an chawi ta a, Leicester mipuiin club neitute chhungkua an ngaina hi an chanchin hriat chian chuan thil thlen dan tur awm ve reng a ni.