Santosh Trophy Mizoram Premier League awm hma khan

India ramin football a tuina a rei tawh a, state leh state inelna Santosh Trophy hi kum 1941 aṭanga ṭan daih tawh kha a ni.

Mipui zat aṭanga thlir chuan India ram state zingah Mizoram aia  football ngaihnatna hmun a awm chuang lo. Amaherawhchu Mizoram hian Mizoram Premier League ṭan hma zawng khan Santosh Trophy nomawi a la chawi ngai lo a ni ringawt lo - final a la thleng lo.

Tun ṭumah hian kum 10 liamta aṭanga Santosh Trophy-a Mizoram chet dan kan thlir kir ang a, MPL awm hnu erawh kan tarlang tel lo ang.

2005-06 Santosh Trophy
Jawaharlal Nehru International Stadium, Kochi-ah final khelh a ni a, Goa an champion.

Mizoram erawh Cluster VIII-ah West Bengal, Nagaland leh Andhra Pradesh nen an awm ho a, group khat aṭang hian pakhat chauh tlang tur a ni.

Mizoram tan S. Malsawmtluanga, Jerry Zirsanga, Vanlalrova leh PC Lalawmpuia te telna hian West Bengal an tluk lo. Hneh lo nei loin goal difference chhiat zawk vangin an tla.

2006-07 Santosh Trophy
Haryana-ah khelh a ni a, Punjab-in final-ah West Bengal hnehin an champion.

Mizoram hi Cluster II-ah awm a, Meghalaya leh Uttar Pradesh laka an tlawm avanign an tla nghal a. Match hnuhnung berah erawh Andaman & Nicobar Islands sawp mah se awmzia a awmzia a awm tawh lo.

2007-08 Santosh Trophy
Punjab an champion chiang a, final-ah Kerala 5-0 in an sawp. Inelna hi Jammu & Kashmir-ah neih a ni.

Mizoram hi Cluster VII-ah Railways leh Chattisgarh te nen group khatah an awm a, an game hmasa berah Mizoram hian Lalhlimthara leh Mama goal hmangin Chattisgarh 2-1 in an hneh nghal a, Railways nen 1-1 in an inhnehtawk.

Railways-in game hnuhnung berah Chattisgarh 3-0 a hnehin Mizoram hi goal difference hmang bawkin an tla.

2008-09 Santosh Trophy
Goa an champion a, final-ah Bengal nen goal awm loa an in draw hnuah penalty shootout-ah 4-2 in an chak.www.vanglaini.org

Tiruchi, Tamilnadu-a Santosh Trophy khelhah hian Mizoram hi qualifying round-ah Madhya Pradesh, Jammu & Kashmir leh Pondichery te nen Cluster III-ah an awm a, Mizoram tan hian Rohmingthanga, Jeje Lalpekhlua, Lamuanpuia leh Zaidinmawia Hmar te an khel a. Mizoram team hian qualifying round an paltlang a, amaherawhchu pre quarterfinal-ah champion zui ta Goa hneh loin an tlawm.

2010 Santosh Trophy
West Bengal hun a in her chhuak a, an khelhmual Salt Lake Stadium-ah Punjab 2-1 a hnehin an champion a, Mizoram pawhin quarterfinal an lut ve ta bawk.

Mizoram hi Cluster VIII-ah Railways, Orissa leh Bihar te nen an awm a, an match hmasa berah Orissa 3-1 a an hneh loh hnuin match hnihnaah Bihar chu 10-0 ngawtin an sawp. Game hnuhnung berah Mizoram-in Railways hneh ngei an mamawh a, minute 33-a Lalrinfela goal hmangin hnehna an chang. Mizoram, Railways leh Orissa te'n point ruk ṭheuh an hmu a, Railways leh Mizoram te hi goal difference inangah Mizoram hi an vannei ta zawk a ni.

Pre Quarterfinal-ah Mizoram in Kerala an hneh a, goal awmchhun hi Beikhokhei-a thun a ni. Quarterfinal-ah Tamil Nadu, West Bengal leh Delhi te nen group khatah awm hoin pahnih tlang tur a nih avangin beisei a sang viau. Mahse Mizoram an mualpho a,www.vanglaini.org match hmasa berah Tamil Nadu lakah 2-0 in an tlawm nghal a. Match hnihnaah beisei la nei nachungin a thlengtu West Bengal chuan 7-1 ngawtin an sawp a. Inkhel hnuhnung berah goal awm lo a, Delhi an draw zui avangin Mizoram hi group mawngphahah an awm.

2011 Santosh Trophy
Manipur-in final an thleng a, mahse West Bengal lakah 2-1 in an tlawm. 

Mizoram team hi Cluster VII-ah Haryana, Madhya Pradesh leh Tripura te nen group khatah an awm ho a, an match hmasa berah mak tak maiin Tripura lakah 3-1 in an tlawm nghal. 

Match hnihnaah Mizoram team an tho leh a, Madhya Pradesh 8-0 in an sawp a, an match hnuhnung berah Haryana 5-0 in an sawp bawk. Tripura aiin Mizoram goal difference ṭha zawk mah se head to head en ṭan kum a nih avangin an tla tho.

2012 Santosh Trophy
Services an champion a, final-ah Tamil Nadu 3-2 in an hneh. Mizoram pawhin quarterfinal an thleng ve leh ta a,www.vanglaini.org mahse semifinal an thleng zo lo.

Mizoram hian cluster VI-ah Uttarakhand leh Rajasthan nen an awm ho a, team pahnih te hi awlsam taka hnehin quarterfinal an lut. Quarterfinal-ah Tamil Nadu, Railways leh Delhi te nen group khatah an awm ho a, Mizoram tan semifinal thlen hi a theih tih a chiang.

Amaherawhchu an match hmasa berah Mizoram leh Railways nen 2-2 a inhnehtawk hnuin Tamil Nadu leh Delhi an hneh lo.

 


Share this Post

Login to comment
No Comments