Nimin khan Santosh Trophy group stage khelh zawh a ni a, semifinal leh final chiah khelh tur a awm ta.

Ludhiana-a inkhelah Punjab-in Maharashtra 2-1 in an hneh a, Jalandhar-ah tling tawh Kerala leh Railways te an inhnehtawk.

Group A pahnihna Punjab leh champion lai Mizoram te March 13 khian an inkhel ang a, March 12-ah Group A www.vanglaini.org hmahruaitu Services leh Group B pahnihna Kerala te an inkhel bawk ang. Semifinal hi Guru Nanak Stadium, Ludhiana-ah khelh tur a ni.

Semifinal a harsa dawn
Mizoram hi chak loh nei loin Group B hmahruatu ni mah se semifinal-a an hmachhawn tur Punjab hi an khaw tualah hneh an awlsam dawn lo.www.vamnglaini.org

Punjab hian an group match pali hi Guru Nanak Stadium, Ludhiana-ah an khel a, Mizoram tan he stadium hi an vawi khat khelhna tur a ni. A harsatna belhchhah turin Punjab hi a thlengtu an ni a, ṭantu an ngah dawn.

National Games-ah Punjab tawhkhirh zia kan hmu tawh a, Mizoram-in group stage-ah 2-0 in an hneh a, final-ah erawh injury time-a Immanuel HS Lalṭhazuala goal hmangin an hneh hram. Khami ṭuma an khelhna hmun kha Kerala a ni a, tunah erawh Ludhiana-ah an inkhel tawh dawn. Nimin khan Mizoramin an khelhna tur hmun hi an thleng ve chiah.

Ṭantu mamawh Mizoram
Group stage-ah Mizoram hi Jalandhar leh Chandigarh-a Mizo awmte aṭangin ṭawiawmna ṭha tak an dawng a, khual khuaah tlangnel takin an khel theih phah. Chutihrualin Mizoram hmachhawn zingah entu ngah tak an awm lo, ṭantu ngah an hmachhawn hunah chuan ṭawiawmna ṭha zawk an mamawh ang.

Tihsual chu
Nimin chhuakah Mizoram hmachhawn tur West Bengal ang a tarlan a ni a, dan hriatfiah dan inan loh vang a ni. Vanglaini palaiin nizan vek khan inelna thuneitu a be pawp zui a, head to head en tur a ni nachungin result a inang a nih chuan head to head en tawh tur a ni lo. Goal difference leh goal for (goal khung zat)-ah team pum pui inkhelh kualna en zawk tur a ni.

Group A-ah Services, Punjab leh West Bengal te'n point riat vek an hmu a, goal difference nei chhe ber West Bengal an tla. Mizoram thlen chin thleng pha lo West Bengal hian Santosh Trophy-ah record an nei ṭha lawr lak a, vawi 31 an champion tawh.

Mizoram manager Vanlalngheta chuan, "Punjab chuan ṭantu an ngah khawp mai. An khelmuala inkhel tur kan nih avangin khelh an harsa dawn a, kan chak ngei erawh ka ring," tiin a sawi.

Share this Post