Huaisen takin FC Goa an tlawm

FC Goa chu AFC Champions League-ah a vawi khat nan an tlawm a, Iranian champion Persepolischu 2-1 in an ngam lo - Group E inkhel dangah Al-Wahda chuan 3-2 in Al-Rayyan an hneh a, Goa hi table-ah pahnihnaah an tla thla zui.

Goan club hian season hmasa Champions League finalist Persepolis hi an barakhaih a, minute 14-na lekah captain Edu Bedia chuan Brandon Fernandes-a freekick pet ṭha tak aṭanga ball kal chu a tauh lut.

Indian attacking mid-fielder ṭha Brandon hian a hnu lawkah chance duhawm a nei zui a, mahse, goalkeeper Hamed Lak chuan a dansak avangin Goa vanneihna a thamral zui.

Goa defender James Donachie-a'n ṭul lo taka Iss Ale Kasir-a tih tluk hnuah penalty a chawi a, Mahdi Torabi chuan minute 19-naah harsatna nei loin goal-ah a chantir.

Goa an bet zui a, mahse, minute nga hnu lawkah Seyed Jalal Hosseini chuan hmahruaina goal a tauh lut leh a, hun tawp thlenga goal dang lut loin 2-1 in Persepolis an chak.

AFC Champions League Team of matchday 1& 2-a a zawna lang thei Dheeraj Singh bawk a langsar leh a, Goa keeper hian shot ṭha tak tak a dan nual bakah Hossein Kanaani-a penalty chu ṭha zetin a dang.

Persepolis tan Iranian player hlangin inkhel bul an ṭan a, hetihrual hian player 11 zinga pakua chu Iran national team tana khel tawh an ni a, an zinga pahnih chiah hi ram tana la inlan lo an ni.