Nets an tho chhuak nghal

Brookyn Nets chu Miami Heat laka an chetsual zauh hnuah an tho chhuak leh nghal. Nimin zing khan Nets hian New Orleans Pelicans 134-129 in an hneh a, overtime khelh ni lo mah se team pahnihin point an hlawh chhuak hnem dun hle.

Smoothie King Center-a inkhelah hliam vangin Kevin Durant a inlan thei lo a, malpui na James Harden pawh a hmel hmuh tur a la awm lo. Mahse, Nets tan Kyrie Irving bawk a langsar leh hle - ani hian point 32 neiin a team a chakpui.

Irving chuan, "Miami nen kan inkhelh ṭum khan a tawp lam minute thum velah a che chhe zawk kan ni a, tunah erawh a tawpah a vannei zawk kan ni ve ta," a ti. Irving bakah hian Joe Harris (24 points) leh Landry Shamet (18) te an khel ṭha hle bawk.

Nets hian regular season kal laiah vawi 32 hnehna an chang tawh, Eastern Conference lamah pahnihna dinhmun luahin, hmahruaitu Philadelphia 76ers nen an chak zat a inang - conference champion bakah NBA champion tum ve ve an ni.

Western Conference lamah pawh hmahruai fal thei an awm lo. Nimin zing khan Los Angeles Clippers chuan Portland Trail Blazers 112-113 in an hneh a, table-ah pathumna an luah.

Clippers hi vawi 41 an chak tling ta chiah a, an chungah hian vawi 41 chak tho Phoenix Suns leh hmahruaitu Utah Jazz (43) te an awm. Match khelh hmabak an la ngah avangin an dinhmun hi a la inthlak kual dawn tih a chiang.