European Super League (ESL) a tawp

Khawvel football inelna ropui ber ni thei tur hiala an sawi European Super League (ESL) chu a awm dawn tih an puan aṭanga ni hnihna lekah a zuih ral.

Pathianni zanah ESL awm tur hi puan a ni a, Thawhlehni zanah Premier League club paruk an inhnukdawk vek!

FIFA leh UEFA rem tih loh inelna hi kil tin aṭangin an dodal a, football tana pawimawh ber fan-te chu a thawh hlawk ber zinga mi an ni. Thawhlehni zan khan Chelsea leh Brighton & Hove Albion inkhelh hmain Blues ṭantuten team bus an dang a, London club hian ESL aṭanga an inhnuhdawh tur thu an puang.

Manchester City-in ESL aṭanga an inhnuhdawh thu official-in an tichiang hmasa ber a; Premier League club pali Arsenal, Liverpool, Manchester United leh Tottenham-te pawhin Chelsea leh City hnung an zui leh bawk.

A bilha tho lo
Europe club lian 12 - Real Madrid, Barcelona, Manchester United, Manchester City, Liverpool, Arsenal, Chelsea, Tottenham, Atletico Madrid, Juventus, AC Milan leh Inter Milan-te intel khawm chuan pawisa tamna inelna thar European Super League din an tum.

ESL hi team 20 awmna tura duan niin, club dintu 15 awm tura tihah 12 chiah an hriat a, a dintua tel anga sawi pathum dang leh inelnaa tel tur club pangate chu puanzar a la ni lo.

Pathianni zana club 12 hming puanzar a nih aṭangin football khawvel nasa takin a nghawng a, khawvel kil tin aṭangin sawiselna a ri chhuak. Team dang pathum hmun ruak luah tura an sawi zinga mi Bayern Munich, Paris Saint-Germain, Borussia Dortmund leh FC Porto te chuan ESL an thlawp loh thu an puang zui.

An inhrosa
Serie A club Juventus president Andrea Agnelli-a'n European Club Association (ECA) chairman nihna kalsanin Super League vice chairman nih a thlang a, club lian awm khawmna ESL boruak a te thei tawh lo.

ESL-ah hian Real president Florentino Perez chu chairman a ni a, Liverpool leh Manchester United neitu John W. Henry leh Joel Glazer-te chu vice chairman an ni ve ve bawk. UEFA president Alexander Ceferin chuan, "ESL-a khel player-te chu World Cup leh Euro-ah khel thei lo tura hrem an ni ang," tiin player-te a vau a, club pawh Europa League leh Champions League aṭanga paih chhuah dan an zawn tur thu a sawi tel bawk.

FIFA President Gianni Infantino pawhin, "Tui lai rapin a awm theih loh. Kal hran an duh a nih chuan chhuak mai se, kan hnuaia awm zel an duh an nih pawhin tichiang mai rawh se," tiin huai takin a ṭawng.

Hemi awmzia chu club-te hian anmahni ram league leh FIFA/UEFA hnuai inelnaa tel loh an ngam chuan ESL hi an titlang thei ang tihna a ni.

ESL-a tel ve lo Premier League club 14-te pawh Thawhṭanni khan an inhmukhawm. "Club 14 te hian chiang tak leh nasa takin inelna hi kan dodal. Inelna kaltlangpui a nih loh nan Premier League chuan a theihna tawp a hmang ang," tiin thuchhuah an siam.

British sorkar pawhin ESL a duh lo a, Prime Minister Boris Johnson chuan ESL tana harsatna an siam tur thu a sawi. British sorkar hian ESL club-te chu foreign player an lak theih loh nan work permit an pek loh tur thu an sawi a, hemi ringawt pawh hi inhnuhdawhna tham a tling.

Fans an rawn lang
Social media lamah chuan football ngainatuten Super League an duh lohzia chu a chiang a, a takin an lantir tel bawk.

Thawhṭannia Leeds United leh Liverpool inkhelah fans lamin an thinrimna an au chhuahpui ṭan nghal a; Thawhlehni zan Chelsea-in Brighton an mikhual ṭumin inkhelh en phal loh ni mah se stadium pawnah fans 1,000 bawr vel an pungkhawm.

Chelsea fans-in team bus an dang a, Chelsea legend Petr Cech chu fan-te zingah kalin insaseng turin a ngen a, an kiang theih chhan erawh club lamin ESL aṭanga an inhnuhdawh tur thu an sawi vang a ni thung - he thu an hriat hian Chelsea fans hi 'champion lawm' ang maiin an sapatal!

Blues-in ESL aṭanga inhnuhdawhna document an buaipui lai hian Man City chuan official-in an tel loh thu an puang. ESL awm theih nana a hnarkaitu Ed Woodward-a'n kum 2021 zawha Man United chief executive hna a kalsan tur thu hriat a ni bawk.

Thawhlehni zanah football chanchin ngaihnawm chi hrang hrang hriat tur a awm a, Nilaini zing khawvar hmain English club-te chu European Super League aṭangin an inhnukdawl fel vek - anni tel lo chuan ESL chu a tawp a ni nghal der mai.

Nilaini khua a var a, Atletico Madrid, Inter Milan leh AC Milan pawhin ESL khelh an tum bik tawh loh thu an tichiang a, ESL chu ball an pet hmain a tawp leh ta a ni!