AP CM-in SOP khauh taka kengkawh turin hriattir

Arunachal Pradesh chief minister Pema Khandu chuan Covid-19 hri leng hluar chho zel avangin deputy commissioner-te chu an bial-ah ṭheuh hri leng laka invenna tura sorkarin kaihhruaina a siamte khauh taka kengkawh turin a hriattir.

CM hian district tina hotute chu online hmangin e-Pragati meeting a neihhpui a, he hunah hian chief secretary leh commissioner te bakah BRO, NHIDCL leh central agency aiawhte an tel.

Pema Khandu chuan check-gate tinah uluk taka duty a ṭul thu leh, state pawn aṭanga lutte chu Covid-19 negative certificate leh Covid-19 vaccine dose hnih an lak tawhna certificate an neih loh chuan rapid antigen test sak vek tur a ni tih a sawi bawk.

"Hripui leng thawh hnihna thleng mek hi a hma ami aiin a danglamin a hlauhawm zawk a ni. Kum naupang zawk zingah hri kai an tam zual a, hei vang hian district thuneituten khauh takin invenna tura kaihhruaina siamte an kenkawh a ngai a ni," tiin CM chuan a sawi. Hemi rual hian hri leng thawh khatna do letna kawnga hlawhtling taka an thawh avangin district thuneitute chungah lawmthu a sawi nghal bawk a ni.

Khandu chuan Covid-19 vaccine pek chhuah chak taka kalpui a ṭul thu a sawi rualin, sample lakkhawm leh test neih chu a tam thei ang ber neih a ṭul thu a sawi. Arunachal Pradesh-ah hian mi 85,000 hnenah chauh vaccine hi pek a la ni.