Assam-in inkaihhruaina thar tichhuak

Assam sorkar chuan an state-a hri darh zel tur venna atana kaihhruaina thar a siam chu a tichhuak a, bazar leh dawrte chu zan dar 6 thleng inhawn phalsakin, Covid-19 hri kai mek, active case 100 chuang awmna district-ah chuan sorkar office-ah non-officer staff chu 50% chin kal turin a ti.

Sorkar hnathawk zingah naupai lai leh, fa kum nga hnuai lam neite chu eng grade pawh ni se, in lam aṭanga hna thawk tura tih an ni. Assam-a district 33 zingah active case 100 aia tam awmna hi district 13 a awm mek a ni.

Chief secretary Jishnu Barua chuan thupek thar hi tichhuakin, kaihhruaina siam bawhchhiate chu Disasater Management Act 2005 leh IPC hnuaiah hremna pek zel an ni dawn tih a sawi. He thupek thar hi April 30 thleng hman tura tih a ni.

Pawn chhuahnaa face mask vuah lo leh, khawlaia chil chhak chu Rs 1,000 zel chawitir an ni bawk ang.

Jishnu Barua chuan an state-ah hri leng dinhmun chu a hlauhthawnawm ṭan hle tih a sawi a, mahse tunah chuan an la thunun thei a, ni 7/8 hnuah eng dinhmun nge an tawh dawn erawh sawi theih a ni lo a ti. Hei vang hian kaihhruaina an siamte pawh an state dinhmun azirin ni 3-4 hnuah ennawn a ni leh dawn a, thupek khauh zawk pawh siam a la ngai maithei a ni, a ti.