State 13-in board exam hun sawn hla tawh

Covid-19 hri leng chuan ramchhungah nghawng na tak a nei chho zel a, state 13-te chuan Class 12 board exam tur an sawn hla tawh a, boruak awmdan a zirin exam hun an puang leh ang.

Central Board of Secondary Education (CBSE) in Class 10 exam tur ṭhulh a, Class 12 exam hun a sawnhlat hnu leh, Council for the Indian School Certificate Examinations (CISCE)-in Class 10 leh 12 exam hun a sawn hnuah state hrang hrang pawhin board exam neih hun hi an sawn a ni.

Maharashtra : Maharastra School Education Minister Varsha Gaikwad chuan Class 10 leh 12 board exam hun sawn a ni tih puangin, Class 12 board exam chu May thla tawpah leh Class 10 tan June ah a sawn sak.

Uttar Pradesh : UP board in May 12 thleng atan Class 12 exam tur a sawn hla. Class 12 exam hi May chawhlkar hmasaber ah Covid-19 hluar dan a zirin an ennawn leh ang.

Odisha : Board exam hun sawn hlat vek a ni. CM Naveen Patnaik chuan exam hun chungchanga thuthlukna chu June thlatir ah an siam tur thu a sawi.

Punjab : Punjab sorkar chuan an state-a Class 10 zirlai te chu pawl a sawntir vek. PSEB chuan thla hmasa khan April 20-a ṭan tur, Class 12 board exam neih tur chu a sawn hla tawh bawk.

Gujarat : Gujarat Secondary Education Board (GSEB) in Class 12 board exam May 10-25 inkara neih tur chu a sawn hla. Exam hun tur hi May 15-ah state dinhmun thlirin an puang chauh ang.

Haryana : Board of School Education Haryana (BSEH) chuan Class 12 exam hun a sawn a, Class 10 zirlaite chu internal assessment a zirin an result siamsak an ni dawn.

Rajasthan : Rajasthan Board chuan May thlaa Class 10 leh 12 exam hun chu a sawn hla.

Telangana : Class 10 board exam cancel a ni a, Class 12 exam hun chu June thla tir an tichhuak ang

Madhya Pradesh : Madhya Pradesh sorkar chuan April 30 aṭanga Class 10 leh May 1 aṭanga Class 12 exam neih tur chu a sawn hla.

Uttarakhand : Uttarakhand chuan Class 12 board exam hun a sawn hla a, Class 10 board exam a ṭhulh bawk. Class 10 zirlai exam duhte tan Class 12 exam ruala pek ve phalsak an ni.

Himachal Pradesh : Class 10 leh 12 board exam hun sawn a ni a, an dinhmun a zirin hun remchang dangah exam hun tur hi ruat a ni ang

Jharkhand : Class 12 board exam hun sawn a ni a, June 1 hian exam hun tur an rel ṭha leh dawn.

Jammu and Kashmir : Class 10 board exam ṭhulh a ni a,Class 12 exam kal lai mek pawh sawn hlain, thla khat ral hnu ah an ennawn leh dawn.