Hri kai thar leh thihpui tam ber ni thleng leh

India ramah Thawhlehni khan Covid-19 hri kai thar leh thihpui tam ber ni a thleng leh. Hri kai thar hi 2,95,041 awmin, hripui vanga thi mi 2,023 an awm belh leh a ni.

Ni sarih chhung chu a zawnin hri kai thar hi nitin nuai hnih chuang an tling tawh a, khawvela US dawtah hri kai hmuh chhuah tamna ber ram a ni mek.

India rama hri kai tuar nasa ber state, Maharashtra-ah chuan Thawhlehni khan hri kai thar 62,097 leh thihpui 519 an awm. State chhunga hri kai an pun chak avangin minister-te chuan full lockdown puang turin chief minister Uddhav Thackeray an ngen.

Delhi khawpuia hri kai thar 28,395 awmin, ni khata hri kai thar an tam ber ni a ni leh. Hri kai an pun chak avanga damdawi-in hrang hrangah oxygen indaih lohna an tawh mek thu chief minister Arvind Kejriwal-a'n a sawi hnu leh, sorkar laipui puihna an ngen hnuah Thawhlehni zan khan khawpui chhunga hospital ṭhenkhatah oxygen hi pek an ni.

Delhi-a sorkar hospital-ah khum 2,105 dah belh
Union Minisrty of Health and Family Welfare chuan Thawhlehni khan Covid-19 hri kai an pun belh zel avangin Delhi-a central sorkar damdawi-in hrang hrangah khum 2,105 dah belh a nih thu a sawi.

Khum 2,105-te hi Delhi-a damdawi in hrang hrang Ram Manohar Lohia Hospital, Lady Hardinge Medical College, AIIMS Delhi, AIIMS Jhajjhar, ESIC Okhla, ESIC Jhilmil, leh All India Institude of Ayurveda,Sarita Vihar-ah te dah belh ni in, March 1, 2021 khan Covid-19 hri kai enkawlna tur khum 510 awmin tunah chuan a let li aia tam in a pun belh tawh. Council of Scientific and Industrial Research (CSIR) puihnain field hospital leh facilty-te hi siam a ni.

Indian Railways pawhin Delhi-a Shakur Basti station-ah rel pindan 50-ah khum 16 ṭheuh chu Delhi sorkarin islolation bed-a a hman a phalsak a, nimin aṭang khan Anand Vihar facility-a rel pindan 25-a khum 16-te hri kai enkawlna turin a hman tir bawk.