Di Maria-a'n chhuanlam tur a nei lo - Van Gaal

Manchester United manager Louis van Gaal chuan red card chungchangah Angel di Maria a chhan lo. Dutch manager chuan, "Spain-ah tawnhriat a nei a, a hre tawh tur a ni. Khawvel khawi hmunah mah referee khawih a thiang lo. Chuvangin chhuanlam tur a nei lo," a ti.

An chak loh chhan sawiin Van Gaal chuan, "Kan khingpuite khelh ṭhat vanga chak lo kan ni lo. Kan chetsual vang a ni a, kan khelh ṭhat tawk loh vang a ni. Chak kan duh a, semifinal thlen kan duh. Premier League ringawt rilru sen hi kan duh dan chu a la ni lo," tiin an khelh dana a lungawi loh thu a sawi.

Arsenal right-back Hector Bellerin red card pumpelh chungchang Van Gaal-a'n sawiin, "Yellow Card ṭum hnihna turah pek a ni lo a, referee thu thu a ni. Ani kha field chhunga thu ber a ni," tiin en liam bak tih theih a neih loh thu a sawi.

Arsenal manager Arsene Wenger chuan, "Club hlui lama chet ṭhat hi a harsa a, rilru huaisen a ngai. Welbeck-a'n a club hlui lamah goal a khung a, a khel ṭha bawk," tiin goal khungtu a fak. www.vanglaini.org

Wenger chuan sawi chhunzawmin, "Nikum semifinal-a Wigan nen Wembley-a kan khelh ṭumin game ṭha tak kan lantir a, tun ṭumah pawh hian khatiang tho kha kan beisei a ni. Kan khingpui tur chu eng pawh ni se kan chak kan lawm phawt ang, chak kan phu a ni. Tuna kan result hian Premier League leh Champions League kan khelh turah phurna nasa min pe ngei ang," tiin an chak avanga a lawmthu a sawi.

Chakna goal khungtu Welbeck chuan, "Mipuiin min lawm avangin ka lawm a, professional player kan nih avangin Old Trafford-ah club hlui hmachawn a ngai a, chu chu a harsa lai tak chu a ni. Min siam liantu United hi ka zah a ni," tiin a sawi.


Share this Post

Login to comment
No Comments