Zola an ban

Serie A club Cagliari chuan an manager Gianfranco Zola chu a hna aṭangin an chawlh tir thu an puang. 

Zola hian thla hnih leh a chanve chauh Cagliari hi a enkawl hman a ni. Chelsea player hlui aiawh tur hian nikuma an ban tawh Zdenek Zeman chu an ruai nawn leh dawn ani.

Kum 48-a upa Italian manager hi player a nih laiin hlawhtling thawkhat viau mah se coaching lamah erawh a vanduai thung. A hun hmasa lamah West Ham United leh Watford te a lo enkawl tawh a, www.vanglaini.org result ṭha a nei lo.

Nikum December thla tawp khan Zola hian beiseina sang tak nen Cagliari hi a zawm a, beisei a pha lo. Tunhnai an game hnuhnung paruk aṭangin point khat chiah an hlawh chhuak. Serie A match 26 khelh tawh aṭangin point 20 chauh an la hmu a, table-ah 18-naah awmin Serie B-a tla thei dinhmunah ding mek a ni.

Cagliari chuan, "Kan club tan a mi pawimawh, player a nih lai leh a hnua manager ni nghal thei kan thlah a ngai hi a lungchhiat thlak hle. Tuna kan club dinhmun a ṭhat tawk loh avangin thuthlukna siam hreawm tak hi kan siam a ṭul ta a ni. A kal leh zelna turah duhsakna sang ber kan hlan e," tiin thuchhuah an siam.


Share this Post

Login to comment
No Comments