Saina a chak zo lo

All England Open-ah India ram mipuiin Saina Nehwal khel lai beiseina sang tak nen an thlir a, result erawh hlauhthawn ruk ang a ni. 

Spanish Carolina Marin-i'n Indian badminton star Nehwal 16-21, 21-14, 21-7 a hnehin a champion. Pathianni zana hmeichhe final khelhah World No. 3 Nehwal-i'n bul a ṭan ṭha a, first set 21-16 a a lak hnuah second set-ah 10-6 in hma a hruai zui mah se a chak zo chuang lo.

All England open-ah Prakash Padukone leh Pullela Gopichand te an champion tawh a, Indian hmeichhe zingah champion thei an awm lo. 

World No. 6 Marin chuan, "Kan inkhelh ṭan tirh khan tihsual ho tak tak ka ngah a, ka hlauhthawn lutuk vang a ni. Second set kan khelh lai khan chak beiseina ka la nei reng a, nuam ti chungin ka khel a, a tawpah ka hlawhtling ta a ni," tiin a sawi.

Mipa lamah Chinese Chen Long-a'n a khingpui Danish Jan Jorgensen chu 15-21, 21-17, 21-15 a hnehin a champion. www.vanglaini.org

Chen hian final thleng turin semifinal-ah Lin Dan a hneh a, a zawnin All England Open-ah a champion.

Kum 26-a upa Chen chuan, "Jorgensen khelhpui a harsa a, amaherawhchu Lin Dan nen erawh khaikhin chi rual a ni lo. All England Open-ah Lin Dan-a record tluk phak ngei ka duh a, chumi tur chuan hriselna ṭha tak ka mamawh a, inhliam loh a ṭul a ni," tiin a sawi.

Badminton player ropui Lin Dan hian All England Open-ah ṭum nga a champion tawh.

Mixed doubles-ah Olympic leh World champion Zhang Nan leh Zhao Yunlei (China) te inkawpin Tontowi Ahmad leh Liliyana Natsir (Indonesia) te chu 21-10, 21-10 in an  hneh bawk.


Share this Post

Login to comment
No Comments