Davis Cup-ah champion lai tla nghal

Belgium-in Davis Cup champion lai Switzerland 3-2 in an hneh a, Great Britain-in quarterfinal lut turin rinkai USA an hneh bawk.

Switzerland team-ah Roger Federer leh Stan Wawrinka te an tel lo. 2-2 a inhnehtawk hnuah hnung na vanga Zirtawpni a khel thei lo David Goffin a inlan thei a. Belgian Goffin hian Adrien Bossel chu 6-4 6-0 6-4 a hnehin an ram a chak pui.

Belgium hian quarterfinal-ah Japan hnehtu Canada an hmachhawn ang.

Inkhel dangah Great Britain leh USA inkhel a ngaihnawm a, Scottish Andy Murray leh American John Isner te'n deciding match an khel a; Murray hian 7-6 (7-4) 6-3 7-6 (7-4) in Isner hi a hneh. www.vanglaini.org

Britain hian Germany hnehtu France nen an khel leh ang. Quarterfinal hi July thlaa khelh leh tur a ni.

Australia pawhin quarterfinal lut turin Czech Republic an hneh a, Italy hnehtu Kazakhstan an hmachhawn dawn. Serbia-in Croatia hnehin quarterfinal an thleng ve bawk a, Brazil leh Argentina chak zawk zawk an hmachhawn ang.

Davis Cup hi mipa tennis player-te tana ram leh ram inelna a ni a. International Tennis Federation  buatsaih niin kum tina neih ṭhin a ni.

Kumin inelna hi vawi 104-na a ni a, March 6 aṭang khan an ṭan a, ruahman lawk dan chuan November 29-ah khelh zawh a ni ang.

Davis Cup winners
2014 =  Switzerland; 2013 = Czech Republic; 2012 = Czech Republic; 2011 = Spain; 2010 = Serbia; 2009 = Spain; 2008 = Spain; 2007 = USA; 2006 = Russia; 2005 = Croatia.


Share this Post

Login to comment
No Comments