World TB Day hman a ni

Nimin khan Mizoram hmun hrang hrangah World TB Day hman a ni. World TB Day hi kum 1882-a Dr Robert Koch-a'n TB thlentu natna hrik a hmuh chhuah thu a puan ní, March 24-ah a kum 100-na, kum 1982 aṭangin hman ṭan a ni a, kuminah chuan Pathianni a nih avangin nimin khan hman a ni.

Lungleiah chuan District TB Centre conference hall-ah chief medical officer (CMO) Dr Thani Pachuau hoa hun hman a ni a; Dr Thani Pachuau chuan, TB natna vi khawvela thihna thlentu tam 10 thlan zinga pakhat a nih thu sawiin, "India ram chuan kum 1962 aṭangin TB dona hi kalpui a ni a, Mizoramah pawh natna tlángláwn a nih avangin kan do a ngai. Ram changkangah chuan nat lohna turin an inveng lâwk ṭhin a, keini pawh inven lâwk a, mithiam zawkte râwn a pawimawh," a ti.

District TB officer Dr LC Liana tarlan danin, khawvela mihring hmun thuma ṭhena hmun khat chu TB hrik pai an ni a, Lungleiah kum 2018-ah TB vei 221 awmin, TB vei 55 hmuh chhuah a ni tawh.

Lawngtlaiah chuan World TB Day hi CMO conference hall-ah hman a ni a, khuallian Shashanka Ala, DC chuan, mihring taksaah TB thlentu bacteria hrik a awm sa vek tih sawiin, "Kan taksa natna dotu a chak ṭhat loh chuan a inlár chhuak ṭhin. TB natna pumpelh turin mahni hriselna uluk a, inenkawl ṭhat a pawimawh," a ti.

World TB Day hi Serchhipah chuan DC Sangchhin Chinzah hoin CMO conference hall-ah hman a ni. Serchhip DC chuan, doctor leh thawktu dangte'n tih tak zeta hriselna lama hma kan sawnna tur an ngaihtuah ṭhin chu a fak a, World TB Day hmannaa kal khawmte chu an tu leh fate leh ṭhenawm khawvengte hnenah TB natna laka inven dan te, inkaichhawn theih natna a nih dante zirtir zel turin a ngen.

Inkhawma tarlan danin, Serchhip district-ah kum 2018 khan TB vei mi 49 hmuh chhuah a ni a, an zinga pathum chu an thi a, 33 chu an dam tawh. Kuminah TB vei mi 12 hmuh chhuah a ni tawh a, thihpui an la awm lo. Mamitah chuan World TB Day hi Kumtluang Hall-ah hman a ni a; chief medical officer Dr Vanlalfela chuan, TB natna ûmbo tur leh inven chu mi tin mawhphurhna a nih thu a sawi.

District TB officer Dr Lal­muanawma Jongte tarlan danin, Mamit district-ah hian kum 2018 khan TB vei rinhlelh mi 428 endik a ni a, mi 28-in TB an vei tih hmuhchhuah a ni.