Liverpool-in Premier League-a an game hmuhnawm FA Cup-ah an chhawm thei lo a, an khelmualah Championship club Blackburn Rovers goal awm lo an draw hram.

Pathianni zan khan Anfield-ah chak zawk an awm loh avangin Blackburn khelmual Ewood Park-ah quarterfinal replay khelh a ngaih phah dawn ta a ni.

Inkhel chu
Liverpool defender Martin Skrtel chu inhliam vangin ṭan aṭanga minute 11-na lekah a aiah Kolo Toure luh tir a ni.

Bul ṭan fuh lo Liverpool an che fuh thei lo a, nawr tum ngial mah se Blackburn defender an ṭhiat hleithei lo. Captain Steven Gerrard a awm lo a, midfielder te'n ball awm ze nei an vawrh lut thei lo. 

Blackburn tan striker Rudy Gestede a langsar a, minute 13-naa a hun ṭha neih chu a tauh out hlauh a, hemi hnu lawka a volley chu Raheem Sterling-a'n a dang hman bawk.

Minute 19-naah Adam Lallana chu  Rovers defender Matt Kilgallon-a'n penalty box-ah a ti tlu a, Liverpool-in duh dan leh referee thutlukna a inang lo. lo.

Minute 32-naah Gestede bawk kan hmu a, www.vanglaini.org French striker hian fing takin Craig Conway tan ball a siam sak a, Scottish winger hian uiawm takin a hlah.

Skrtel aia lut Toure-a'n Liverpool tan goal khung mah se, offside vanga pawm a ni lo. Liverpool-in an viau a, first half hun pek belhah Sturridge goal shot ṭha tak chu Blackburn goalkeeper Simon Eastwood chuan ṭha takin a dang.

Second half-ah Liverpool keeper Simon Mignolet hmuh tur a awm nghal a, minute 49-naa Alex Baptiste ball tauh ṭha tak chu ṭha zetin a dang. 

Minute 55-naah Liverpool-in ṭum hnih nan penalty an beisei a, Matthew Kilgallon chuan Daniel Sturridge chu chiang takin penalty area-ah pawt thlu mah se referee-in a hmu lo miau a, Blackburn an vannei.

Liverpool tan Toure leh Sturridge te'n hun ṭha an nei a, Toure-a ball tauhin goal post a per laiin Sturidge chuan hnai tak aṭangin goal zawnah a pet lo.

Inkhel chhehvel
Liverpool hian inkhelh chhung zawngin goal zawna pet an harsat a, shot vawi 21 an neihah target-ah vawi li chiah an pet thei a, Blackburn-in shot vawi li an nei thung.

Tunhnai Premier League-a an khelh dan en chuan Liverpool hi chak zawk tura beisei an ni. Blackburn-in hlau loin an khel a, an phu ang ngeiin draw result an hlawhchhuak ta a ni.

Liverpool hian FA Cup final an lut a nih chuan, season thara chhuak tur an captain thlahna duhthusam a ni ang. www.vanglaini.org FA Cup final hi May 30-ah khelh a ni dawn a, hei hi Gerrard-a kum 35 tlin na tur a ni. A pianchama Liverpool tana a game hnuhnung ber Wembley-ah ngei khelh hi Gerrard pawn a châk ngei ang.

Eng nge an sawi
Liverpool manager Brendan Rodgers chuan, "Blackburn khan an khel ṭha takzet a, an tlar hnung kha an rem phui ṭha hle a ni. Penalty hmuh kha kan phuin ka hria a, mah se pek kan ni tlat si lo. A chang hi chuan chak tur chuan vanneihna hi kan mamawh tel ve bawk a ni,"  a ti.

Rodgers hian defender inhliam Skrtel chu ngaihtuahawm a nih loh thu a sawi tel bawk.

Blackburn manager Gary Bowyer chuan, "Anfield-ah goal chhuah loh hi kan tan chuan a awihawm loh zawk a ni. Ka naute  an khel ṭha takzet a, a bik takin Gestalde kha a khel ṭha lehzual, Liverpool defender te kha a chhaih buai hneh hle a ni," tiin replay an hlawhchhuak chu a lawmthu a sawi.

Share this Post