Lok Sabha-ah ruling an la awm lo, BJP ni lo sorkartir kan tum - Tetea Hmar

MP candidate Lal­nghinglova Hmar (Tetea) chuan, Lok Sabha in­thlanpui neih turah hian ruling an la awm lo a, ruling tur thlan a ni dawn chauh tih sawiin, "Mizoram inthlan chu a zo tawh a, Lok Sabha-ah BJP ni lo sorkartir kan tum a ni," a ti.

Nimina MPCC leh ZPM-in Vanapa hall-a campaign kick-off hun an hmanah Lalnghilova Hmar chuan, "Lok Sabha inthlanah hian tu pawh tling ila, MP fund a pun phah dawn lo a, state-a ruling mi nih vangin a pung dawn lo," a ti a; a tling a nih chuan MP fund awmze leh Mizoram hmasawnna tura hman a tum thu a sawi.

NDA chu BJP-in kum 1998-a an din a ni tih sawiin, chu'ng zingah chuan MNF pawh an tel thu leh MNF chu central-a BJP an sorkar theihna atana hma latu a nih thu a sawi a, "MNF hi Citizenship Amendment Bill kaltlangpui tumtu NDA/BJP an sorkar theihna tura hma latu an ni a, chutih laiin, CAB do angin an la insawi tlat a ni," a ti a; MNF-te chu an nihna tichiang turin a phût.

Lalnghinglova chuan MNF unaute chu kan thisen zawmpui, khawtlang leh kohhrana a rawngbawlpuite a nih thu sawiin, "Mi fel tak tak an ni a, tunah state-ah sorkarna an siam a, tluang takin sorkar se ka duh. Mah se, Lok Sabha inthlanah hi chuan kan thil in chuh a lian em a, min vote turin MNF unaute ka sawm a ni," a ti.

MP a nih chuan in­fiamna lamah pawh nasa zawkin hma a la thei dawn tih sawiin Lalnghinglova chuan, "Sport leh football hi level sang zawk aṭangin ka buaipui thei tawh ang, tun aia uar zawkin kan kalpui thei dawn a ni," a ti. Ṭhalaite tan a au dawn tih sawiin, "Parliament-ah Mizo ṭhalaite kan au ve thei a ni tih lantir ka duh," a ti a, hnam dang ṭhalaite pawhin an tih theih chu Mizo ṭhalaite pawhin an tih theih thu a sawi.

MLA bye-election-a candidate Lalbuanga Sailo chuan, ani aia mi fel leh phu tak tak an awm chunga INC leh ZPM thlàwpa independent candidate a ni thei chu lawmawm a tih thu sawiin, "Pathian leh mipui zarah ka tlin ngei ka beisei a, theihtawp chhuah turin ka pn chhuak a ni. Kan thawhhona hi a zahawm, a ropui. Party-te'n an nihna kalsanin, issue lian tak atana an inpekna hi a ropui, ka zah em em a ni," a ti.

Lalbuanga Sailo chuan, "Kan vote hmang­in hnam hnatlang kan nei leh dawn. BJP lamṭang kan vote tling a nih chuan, hnam dangte hian min hmusit ang a, a pawi ngawt ang," a ti a; Mizorama sorkar laiin MLA an mamawh belh tawh lo tih sawiin, "Ruling chak a ṭhat rualin, opposition chak a ngai. Ka tling a nih chuan, ruling thil ṭha tih do leh sawisel ka tum lo. Thil dik lo an tih chuan, rorelna sangah ka hmachhawn ve ngam ang, tih ka intiam a ni," a ti. MLA fund hmangin dik leh fel taka tih a tum thu a sawi.