MNF hi zau zawka Pathian rawng ka bâwlna tur a ni tih ka pawm - Lalrosanga
Lok Sabha inthlan tura MNF party candidate C Lalrosanga chuan nimin khan Chhingchhip Mualpui, Chhiahtlang leh Serchhip Bazar kâwnahte vantlang inkhawm neiin thu a sawi a; MNF chu zau zawka Pathian rawng a bâwlna tur a ni tih a pawm thu a sawi.
C Lalrosanga chuan, ram chu Lalpa ta a nih avangin ram tana rawngbawlna chu mahni inhâi vûr leh nawmsak nan hman tur a ni tih sawiin, "MLA inthlan dawn khan sorkar ṭha duhin Zoram mipui, kohhran leh mimal kan ṭawngṭai a, a chhanna chu MNF sorkar lo piang hi a ni. He party ngei hi zau zawka Pathian rawng ka bâwlna tur chu a ni tih ka pawm," a ti.
MNF chu Mizo hnam nihna nationalism chawi sangtu a nia sawiin Lalrosanga chuan, "Martarte thisen kha a zahawm a ni. Sorkar tirh phatah hriat tham leh hmuh thamin hna an thawk nghal a, hemi thláwp tur leh tichak tur hian ruling MNF MP ngei Parliament-ah kan neih a
ṭul," a ti a; Mizoram sorkar scheme, project leh programme hrang hrang siamte bawhzui turin sorkar thlâwp tur MP ngei a neih a ngai niin a sawi.
C Lalrosanga chuan, sorkar hna a thawh chhungin state dang hmasawnna hrang hrang a hmu a, Mizoram hnufualzia a hriatin a rualawh thlak a tih thu sawiin, "Thingtlang lamah kum 10 kal ta chhung khan hmasawnna a luh tur angin a lut lo nasa. Sorkar laipuia ministry leh department hrang hrangte ka hna avangin ka lo dawr ve tawh ṭhin a, mikhual bik lo turah ka inngai," a ti.
MNF Candidate chuan, ram hmasawnna tura MP pawimawhna leh ṭangkaina a hria tih sawiin, "Thlan tlin ka nih chuan Parliament chhung leh páwnah CAB leh kan Zoram tana thil ṭha lo hrim hrim na takin ka do zel ang," a ti a; Mizote thlavâng hauh a ṭulna apiangah a tlanchhe dawn lo tih a sawi.
Minister of state Lalruatkima pawhin thu sawiin, Congress sorkar kum 10 chhungin kawng tinrengah mipui an mangang niin a sawi a, "Mimal tin leh kohhran mite kan ṭawngṭai a, a chhanna chu MNF sorkar thar hi a ni. Sorkar tûkah kawngpui siam nghalin, zu kan hnungkhirh ṭan a, sikul ṭan hun thlengin kan siam danglam nghal," a ti.
Lalruatkima chuan, "Thla thar aṭangin Congress lo tihtawp tawh chini pawh kan sem leh ang," a ti a; traffic jam pumpelh nan kawng chhâwng siam nan provisional fund cheng vbc. za tél an hmuh thu leh MP election-ah Pathianin mal a sawm leh ngei a beisei thu a sawi.