Champion lai Atletico an chak zo lo

La Liga Champion lai Atletico Madrid leh an mikhual Valencia chu Pathhianni zan khan 1-1 in an inhneh tawk a, chak zo lo Atletico tan hian champion nomawi humhim a huphurhawm tawh ang.  

Mual neitu Atletico in inkhel bual an ṭan ṭha zawk a, inkhel erawh an thunun mai bik lo. Minute 33-naah Koke chuan he inkhel a goal hmahruai a thun. Atletico in first half-ah 1-0 in hma an hruai. www.vanglaini.org Atletico hian point thum an hmu mai dawn a alan laiin minute 78-naah Shkodran Mustafi  chuan hnai set sawt aṭangin a tauh goal. Javi Fuego chu hun tawp hma hret minute 89-naah hnawhchhuah ani zui. Inkhel tawp thlengin goal dang a lut tawh lo a 1-1 in an ṭin.

Inkhel dangah Barcelona in an khingpui Rayo Vallecano chu 6-1 an lo sawp avangin Atleticoa tan champion beiseina a chau tawh hle. Hmahruaitu Barca nen hian point sarih laiin an inthlau tawh a, match 12 khelh tur an la neihah Fernando Torres leh a ṭhiante tan chetsual a thiang tawh lo. 

Atletico Madrid coach Diego Simeone chuan, "First hlaf-ah kan khel ṭha a, chawlh lawk hun lamah Valencia in an khel ṭha zawk thung, draw hi result ni awm reng a ni. tunah chuan Barcelona leh Real madrid nen chauh kan inel tawh lo a, Valencia leh Sevilla te nen pawh kan inel viau a ni. Chvangin in dawmkun mai loin hmalam kan thir zawk tur a ni," tiin a sawi.


Share this Post

Login to comment
No Comments