INC-ZPM-in campaign kick-off hun hmang

Mizoram Pradesh Congress Committee (MPCC) leh ZPM chuan nimin khan Vanapa Hall-ah April 11, 2019-a Lok Sabha inthlanpui leh Aizawl West-I MLA bye-election neih tura mipui candidate-te pualin campaign kick-off inkhawm an buatsaih. Candidate pahnihte bakah, MPC president Lalhmangaiha Sailo, MPCC president Lal Thanhawla leh ZPM leader Lalduhoma ten thu an sawi.

ZPM leader Lalhmangaiha Sailo, MPC president ni bawk chuan, mipui candidate-te pahnih chu duhsakna hlanin, "Zâm loin theihtawp chhuah ula, back-up tur che u-in Zoram mipui kan awm a ni," a ti a; MNF thawhpui BJP/NDA sorkarin kum nga chhungin an intiamna an hlen lo hle tih sawiin, unemployment a pun nasat avangin mipui an lungawi lo a, lo neitute an mangang a, an 'Make in India' pawh a hlawhchham tih a sawi.

Lalhmangaiha Sailo chuan, kum 2018-a Mizoram Assembly inthlanpuia INC leh ZPM vote hmuh belhkhawm chu 53.73% a nih laiin, MNF vote hmuh chu 38.44% chiah a ni tih a sawi a, "MNF aiin kan tam zawk a, MNF chakna kha a sang em em lo tih a hriat. Hetiang chiah chiah hi ni tawh lo mah se, chakna chance kan nei ṭha hle a ni," a ti.

MPCC president Lal Thanhawla chuan, politics chu Pathian rawngbawlna a ni tih sawiin, "Mizo Kristiante phei chuan chhia leh ṭha hriatna thianghlim tak nen Pathian ráwn chungin kan kalpui tur a ni. Tun ṭum inthlan hi ringtute leh ring lo mite indona ang hial a ni," a ti.

Lal Thanhawla chuan, Hindu-te chuan India rama sakhaw dangte zingah Muslim leh Kristiante an haw bik a, sakhaw tênau dangte chu an haw lutuk lo tih a sawi a, "An target no. 1 kan ni... MNF-te hian eng ang pawhin pha mah se, NDA leh NEDA-ah an tel avangin BJP-ah an tel tihna a ni a, he pawla tel party-te hi Mizo Kristiante hian kan hnâwl tur a ni," a ti a; Lok Sabha inthlan awm turah India ram, Hindu rama siam tumtute nen an inbei mek tih a sawi.

BJP chu an sorkar leh Citizenship Amendment Bill (CAB) tharthawha kaltlangpui tumtu an ni tih sawiin Hawla chuan, "CAB an put luh theih lohna tura ṭan kan lak a ngai a, an tih hmaa kan do a ngai. Ti thei lo tura siam hmasak a pawimawh avangin, party-a kan nihna kan dahṭha a, tun hi CAB do tura ṭanrual hun a ni," a ti a; MNF-te chu NDA-in CAB an tharthawh hun nghak lo a, an tharthawh hmaa NDA aṭanga inhnûkdâwk turin a phût.

ZPM leader Lalduhoma chuan, Mi­zoramin inthlan a hmachhawn mekah vote tur ngaihtuah chiam ngai loin a chiang tih a sawi a, "Kan hnam, kan ram, kan sakhua hi a him kan duh a nih chuan, MNF ruh tak ni lo zawngte chu kan ṭan tlân a hun... Tun inthlanah hian zu zawrh hi issue a ni tawh lo, sawhthing pawh issue a ni tawh lo. Issue chu BJP leh an thawhpuite paihthlak a ni," a ti.

Lalduhoma chuan, INC leh ZPM-te chu an policy a inang vek lo a, an ngaih pawi­mawh pawh a inang lo tih sawiin, chuti chung chuan Mizo ram, hnam leh sakhua himna turin Lok Sabha inthlan awm turah an thawkho tih a sawi a, "INC leh ZPM-te thawkho thei loa sawi hi mipui bum tumna a ni a, issue azir zelin thawhhona a awm ṭhin... Hman aṭanga NGO-te'n an do tho kha do chhunzawm turin kan thawkho a ni," a ti.

Lalduhoma sawi danin, eptu party-te thawhhona aṭangin Lok Sabha MP pathum - Roṭhuama, Dr H Lallungmuana leh Vanlalzawmna te thlan tlin an ni tawh. Kum 2014 Lok Sabha inthlanah pawh INC tih loh eptu party zawng zawng thawkhoin NDA an thawhpui a, prime minister Narendra Modi lak luhnaah pawh Zoramthanga, Lalhmangaiha Sailo leh Lalduhoma te an tel a, mahse, MPC leh ZNP-te'n NDA an zawm tihna a ni lo.

NDA/BJP sorkar a din hnuah ZNP chuan NDA an zawm ve tih sawiin Lalduhoma chuan, "July 8, 2016-ah NDA kan chhuahsan thu official-in kan puang. A chhan chu - Hindutva tihhlawhtlin tuma hma an lak vang a ni. An ṭhian nih hi keini tan chi chi a ni lo a, kan do tur an ni zawk tih kan chian tâk avangin kan chhuahsan ta a ni," a ti.