Vanglaini - Goal nen a bul ṭan Kaka

KHAWTHLIR

MST bus hun

Transport department chuan, mipui tana remchan zawkna vangin Aizawl-Silchar MST bus service chu chawhnu dar 1-a chhuak tawh loin, zing dar 6-ah a chhuak ṭhin dawn tih a tarlang. Hei hi vawiin aṭanga hman ṭan a ni ang.

Medal lawmpui

Mizoram State Sports Council (MSSC) chuan nimin khan an office-ah tun hnaia infiamna chi hrang hranga Mizoram tana medal dawngtute chawimawimna hun an buatsaih a, Mizoram Commission for Women chairperson Vanlalawmpuii Chawngthu, MLA-in a hmanpui.

MCCF din cham

Mizoram Cancer Care Foundation chuan vawiin chawhma dar 11-ah Zemabawka Mizoram State Cancer Institute-ah an din champha an lawm dawn a, an member-te a tam thei ang ber kal turin an insawm.

Training buatsaih

World Vision India, Chhimtuipui ADP chuan nimin khan Lawngtlai Press Club-ah an area chhunga ṭhalai, thil chi hrang hrang training tura an thlante tan training an buatsaih. Training tura thlante chu puanṭhui zirtur mi 24, computer zirtur mi 12, motor khalh zirtur mi pahnih leh mechanic zir tur mi pahnih an ni.

Women’s Day

Mizoram University-a Public Administration buatsaihin nimin khan MZU-ah International Women’s Day an hmang a, 'Women in governance and their participation in politics' tih thupui hmangin workshop buatsaih nghal a ni. International Women’s Day hmannaah hian MZU vice chancellor Prof. R Lalthantluanga khuallian a ni a, zirtirtu leh zirlai ṭhahnem tak an tel. International Women’s Day hi March 8 a ni a, Pathianni a nih avangin niminah an hmang a ni.

Ruihhlo man

Excise & Narcotics department chuan nimin khan Edenthar-ah Lalruatthanga (23), Phunchawng Veng nia insawi hnen aṭangin heroin grams 3.15 an man. Lalruatthanga hi thubuai siam sak a ni.

DAWNTISEI

Goal nen a bul ṭan Kaka

Pathianni zan khan New York City leh Orlando City an inkhel a, si khat ve ve thunin an inhneh tawk. Orlando goal hi hun tawp dawna Kaka thun a ni.

Football aia game dang an ngaihsanna hmun United States-ah Pathianni zan khan New York City leh Orlando City inkhel en turin mipui 62,510 zet Orlando khelmual Citrus Bowl-ah an pungkhawm. www.vanglaini.org New York City tan Mix Diskerud chuan first half-ah goal a khung a, he goal hi minute 91-naah Kaka chuan free kick aṭangin an sut a ni.

New York City tan hian kum 33-a upa David Villa chu a inlan bawk a, mah se a team te a chak pui zo ta lo a ni. Premier League season tawp rual hian Frank Lampard chuan New York City hi a zawm ve bawk ang.

Goal khungtu Kaka chuan, "Game harsa tak ani chung kan draw thei kha a lawmawm hle. Ka beisei phak bakin fans kan ngaha a mak ka ti. Ka lo suangtuah lawk na aiin he www.vanglaini.org League hi a lo ropui hle a ni. Hmasawnna tur kan la ngah em em a, kan inzir zel dawn a ni," tiin a sawi.

Share this Post

Login to comment

No Comments