NECS Cup quarterfinal : Vawiinah a thiam pali dang

Veng leh khua football hmanga inelna NECS Cup quarterfinal chu vawiin hian khelh zawh a ni dawn. Chawhma dar 11:00-ah Lengpui leh Chanmari West te an inhmachhawn ang a, tlai dar 1:00-ah Chanmari leh Armed Veng te Lammualah an inkhel ang.

Lengpui hi Aizawl khaw chhunga tlangnel tur khawpa record leh player nei ṭha an ni a, an khingpui Chanmari West lam hi CYMA 2012 finalist an ni a, an hlau bik lo tawp ang. Tualchhung football-ah Armed Veng leh Chanmari sulhnu len zia chu tlang hriat a ni a, tun ṭumah pawh hian an la ṭha tho.

Lengpui leh Chanmari West
Lengpuiin veteran player Rohmingthanga sulhnu chhui tur ṭhahnem tak an chher chhuak a, chung zingah chuan captain Joe Zoherliana, F. Lalremsanga, Larry Lalrinawma leh India junior team tana khel pha Lalrokima te an kawl. Mizo te hi eng ang chiaha thiam nge an nih hriat duh chuan Lengpui inkhel en hi a sual lo ang.

Aizawl khaw pawn team hi kum 2006 khan CYMA Football-ah an champion a, Mizoram barakhaihin Rohminga leh a nau Lalchhuanmawia te che tla chuan tualchhung football tlahniam mek chu a vawrh sang chho leh. Chutihrualin coach RK Hmingthansanga'n an theihna ang chiahin a rem lo nge quarterfinal thleng turin Khatla 1-0 chauhin an hneh.

Chanmari West erawh an veteran striker H. Lalnunzira chungah an la innghat lian hle a, Zirtea hian tun inelnaah goal ruk a khung tawh. West Warrior hian an match hnuhnung berah player ṭha tamna Armed Veng South an hneh a, belchhian an dawl tih a chiang.

Lengpui hian Chanmari West lama goal khung an tum a nih chuan veteran defender Malsawma Chhangte leh Lalrinchhana (Itana) te an paltlang a ṭul dawn tihna a ni a, a awlsam lo tawp ang. Chanmari West enkawltu R. Zoramthara hi an veng mi leh an veng player hrechiang a ni a, ani hian mipui ṭan a hlawh ang.

Team ropui pahnih
Mizoram football-ah chuan Armed Veng aia sulhnu nei lian an awm chuang lo a, kum 1985-a CYMA Football ṭan a nih khan an champion nghal a, kum 2003-ah champion lehin kum 2010, 2012 leh 2015 ah te nomawi an chawi leh bawk. Kum 2015 bik hi Armed Veng tan kum ṭha a ni a, CYMA Football bakah NECS Cup-ah a vawi khat nan nomawi chawiin double champion an ni.

Armed Vengin tun dinhmun an thlen theihna tura mi pawimawh Lalbiaksanga Colney chuan an veng team hi a la ho a, player ṭha Lalfakzuala, Lalbiakhlua, Lalmuanzova leh Vanlalduatsanga te bakah rawlthar ṭha an kawl avangin champion hial an inbeisei ang. Amaherawhchu vawiin hian Bethlehem Vengthlang an hneh ṭuma hnawhchhuah East Bengal defender Lalramchullova a khel thei lo ang.

An khingpui tur Chanmari hi 2012 khan Red Ribbon Football-ah an champion a, tun ṭumah pawh hian khami ṭuma midfielder pawimawh Rochhingpuia kha a la pawimawh reng. Chanmari fapa rangkachak Chhinga leh Lalnunzama te chu Armed Veng tana ven uluk ṭul a ni dawn.

Chanmari hian tlarhnungah Aizawl FC defender pahnih Lalrinchhana Tochhawng leh Lalhriatrenga (Achia) te an kawl bawk a, club inelnaa team ropui hian veng inelna a team ropui hi hneh ngei an tum ang.

Vawiin Inkhel Tur
Lengpui 11:00 AM Chanmari West
Chanmari 1:00 PM Armed Veng