Germany 'Thar' leh Serbia inhnehtawk

Germany head coach Joachim Low chuan team thar a din hnua an match hmasa berah Serbia nen 1-1 in an inhnehtawk. Amaherawhchu an inkhel hi friendly match a nih avangin nghawng pawi tham a awm lo a, Pathianni zana Netherlands nen Euro 2020 Qualifier-a an inhmachhawn turah erawh hei aia result ṭha an beisei ang.

Netherlands hian Nations League-ah Germany leh France nen group khata awm chungin semifinal an lut a, Low-a hote erawh an relegate thung. Ronald Koeman hote hian nizan khan Belarus nen qualifier-a an match hmasa ber an khel a, group C-ah hian Estonia leh Northern Ireland an awm bawk.

Inenchhina
Joachim Low hian bul ṭan ṭhat tumin Bayern Munich trio Mats Hummels, Jerome Boa­teng leh Thomas Muller te chu ram tan a koh tawh loh tur thu a sawi a, Serbia nena na inkhel hi thutlukna mak tak a sawi hnuah an match hmasa ber a ni.

Germany boss chuan friend­ly match hi player naupang zawk fiahna hun atan a hmang a, tawnhriat nei ṭha zawk Toni Kroos leh Marco Reus te chu bench-ah a dah a. Goalkeeper-ah erawh tun hnaia sawisel hlawh Manuel Neuer chu Marc-Andre ter Stegen aia thlan chhunzawm a ni a, captain armband a hreng bawk.

RB Leipzig defender Lukas Klostermann chu a vawi khat nan ram tan a inlan a, inkhel bul ṭantu dangte chu Niklas Sule, Jonathan Tah, Joshua Kimmich, Julian Brandt, Ilkay Gundogan, Marcel Halstenberg, Kai Havertz, Leroy Sane leh Timo Werner te an ni .

Germany starting eleven chawhrual hi kum 24 leh thla hnih vel lek a ni a, Neuer ten ram tan vawi 85 zet an inlan tawh chungin chawhrual chuan ram tan vawi 22 khelh ṭheuh ang lek an nia, vawi 10 la inlan tling lo pali an awm.

An la patuai
Joachim Low duh danin Germany-in ball chang tam mah se goal hmaah an hriam tawk lo a, Serbia-in corner hmang ṭangkaiin Luka Jovic chuan minute 12 lekah a tauh lut. Mualneitu lam hian khung turin chance ṭha insiam an harsat a, Boateng leh Hummels te awm lohna tlarhnung a la phui chuang lo.

Second half-ah Ter Stegen leh Marco Reus te an lut nghal a, Borussia Dortmund captain hi Serbia tlarhnung tan a hnawksak nghal a, goal khungtu erawh bench aṭanga rawn lut tho Leon Goretzka niin Bayern midfielder hian minute 69-naah ṭha zetin a pet goal.

Germany-in chak tum mah se hun chanve hnu lama armband hrengtu Gundogan leh Sane te goal hmaah an vanduai a, chakna goal hmuh tur a awm lo. Injury time-ah Milan Pavkov chuan mawi lo zeta Sane a tlawh avangin hnawhchhuah a ni a, inkhelh banah Low chuan, "Hliam na lutuk loa a chhuah avangin a vannei hle. Khatiang tackle-ah kha chuan ruh hial tliah theihna a ni," tiin Pavkov chet dan a dem hle.

Lawmna tur a awm

Germany boss Joachim Low chuan, "First half kha chu kan vawi khat khelh hona a ni a, a harsa deuh a ni. Second half-ah erawh pressure kan pe ṭha a, kan khelh danah lawmna tur a tam a, goal khung tak erawh kan harsat deuh. Kan chetsual tam tak pawh kha tawnhriat neih tam zela hmasawnna tur a ni. A pumpuia thlir chuan kan khelh danah ka lawm," tiin a sawi.