Euro sawn hi Italy tan a ṭha - Mancini
Italy coach Roberto Mancini chuan Euro 2020 neih hun tur sawn a nih chu a karlakah harsatna a thlen theih thu a sawi a, chutihrualin ram lian dangte elphak turin an tan inbuatsaihna hun ṭha a nih thu a sawi bawk.
Euro 2020 hi Covid-19 vangin kumina neih tur chu nakkum atan an sawn hla a, inelna lian khelh chak viau tawh mah se a tak ram thleng tur chuan thla 10 chhung vel an nghah leh rih a ngai dawn tihna a ni.
Football ram ropui Italy hi World Cup hnuhnung berah khan an tling zo lo. 2018 khan Mancini-a’n enkawl ṭanin nasa takin hma an sawn, a zawna match 11 chhung chakin Euro 2020 qualifying-ah 100% chak record an nei hial.
Italian manager Mancini chuan, "Kumin June thlaah inelna nei ta ila ṭha takin kan khel thei ang. Chutihrualin hun rei tak aṭanga team lo indin nghet tawh France te nen chuan kan boruak a la in ang lo thei viau ang.
"Kum khat kan nghak leh a nih chuan ka naute nen thawhhona hun kan neih belh dawn a, tawnhriat kan nei ngah sawt dawn avangin kan tan a ṭha. Team ṭha ber hneh tura kan ṭhat tawk dawn avangin nomawi kan chawi theih pawh ka beisei," a ti.
Italy hian nikum November thla khan Armenia chu 9-1 in an sawp a, kumin March thlaa friendly match pahnih an neih tur chu coronavirus vanga ṭhulh a ni. Match an neih leh hmasa tur chu September thlaah daih a ni tawh ang.
Manchester City manager hlui chuan sawi zawmin, "September thlaah inhmuhkhawm leh kan beisei chauh a ni a, kan tan chuan kum khat ang vela rei a ni hial ang," tiin inkhel hmachhawn leh a chak tawh thu a sawi.
Nimin tlai thleng khan Italy ramah Covid-19 kai mi 1,32,547 chuang an awm tawh a, thi pawh mi 16,523 chuang tawhin khawvela a tuar na berte zinga mi an ni mek.