Vondrousova lakah Halep a tlawm

Simona Halep chu seeded pawh chang phak lo Marketa Vondrousova lakah a tlawm avangin BNP Paribas Open last 16-ah an vaw tla a, Vondrousova hian a match lehpekah chuan Elina Svitolina leh Ashleigh Barty te inkhela chak zawk a hmachhawn leh ang.

Kum 19 mi Vondrousova hi tun dinhmun­ah chuan world number 61 nilai a ni a, Romanian nula Halep lakah chak tura rinkai ni lo mah se darkar khat leh minute 39 chhungin 6-2, 3-6, 6-2 in a chak zawkah a ṭang a ni.

Last 16 kalkawngah Vondrousova hian 2017 French Open champion Jele­na Ostapenko leh nikum Indian Wells finalist Daria Kasatkina te pawh a hneh tawh a, khelh fuh thut vanga thleng sang a ni lo tih a hriat theih.

Vondrousova chuan, "Ka tlan tam em em a, ka inkhelh chhung kha chuan thil dang ngaihtuah ka nei lo. Ka khelh danah ka lawm a, round sang zawk ka thlen theih avangin ka lawm zual," tiin a sawi.

French Open champion Halep hian coach nghet pangngai a nei lo rei ta hle a, nikum August thla a Canadian Open nomawi a chawi hnuah WTA title lak a la nei leh lo.

Inkhel dangah Bianca Andreescu chuan Chinese player Wang Qiang chu 7-5, 6-2 in a hneh. Canadian nula hian Kiki Bertens 5-7, 6-1, 6-4 a hnehtu Gar­bine Murguruza a hmachhawn leh ang.

Kum 18 mi Andreescu hian January thla khan Auckland Open final a luhna kawngah world number 1 hlui pahnih Caroline Wozniacki leh Venus Williams te a hneh tawh bawk a, player langsar leh tawnhriat ngah lakah pawh huaisen takin hnehna a chang thei tih a lantir tawh.