UAE hmaah India an mualpho

Oman nen 1-1 a an inhnehtawk avanga phur takin India chuan Thawhṭanni zan khan UAE an hmachhawn a, an mikhualna ramah 6-0 in an mualpho.

UAE tan Ali Mabkhout chuan a thiam thil pholangin hattrick-a siam a, Khalil Ibrahim, Fabio Lima leh Sebastián Tagliabue-ten goal khat ṭheuh an khung bawk.

India leh UAE inthlau mah se goal ruk chhuah hi mualphona tawp a tling a, dem tur an awm a nih chuan coach Igor Stimac chu kawh rawn tur a ni.

Blue Tigers player-te hian an tlawm hnuah UAE an chhuahsan nghal a, nimin khan New Delhi an rawn thleng leh tawh niin Vanglaini chuan thu a dawng.

Thutlukna âtthlak

Stimac-a'n Oman laka bul ṭan India squad aṭangin player pariat ngawt a thlak danglam a, Akash Mishra, Suresh Wangjam leh Manvir Singh-te chu Oman laka bul ṭan, UAE laka bul ṭan nawn awmchhun an ni.

Lallianzuala Chhangte leh Lalengmawia (Apuia) te pawh bul ṭan zingah an tel. Stimac-a'n rin loh taka bul a ṭantir Suresh chu 4-2-3-1 formation hmangin midfield-ah Apuia nen an inkawp a, mual sir aṭanga goal nawr turin Lianzuala leh Liston Colaco an awm.

Tlarhmaah Manvir chu maltlat tir a ni a, a hnung chiahah Anirudh Thapa dah a ni - tlarhnung laiah tawnhriat nei tam lo Mashoor Shereef leh season hmang ṭha lo Adil Khan inkawptir an ni a, thil mak a tling.

Gurpreet Singh Sandhu-a'n goal a veng a, right back-ah Pritam Kotal khelin Akash chuan mual vei lam sir a veng thung.

I dawn chiang lo...

Stimac-a'n squad-a Indian player-te a hre chiang tawk lo a, an khingpui team hi a hre chiang lo lehzual em ni chu aw, tih mai tur a ni.

Croatian coach hian 'high defensive line' hmangin Indian player-te a tawlh hma tir a, UAE hi pressure pek a tum - mahse, centre back-a player che muang pahnih Mashoor leh Adil Khan inkawptir chunga 'high defensive line' hman hi "I dawn chiang lo a ni, Stimac," tih bak chuan sawifiah theih a ni lo.

India player-te an tum leh châk angin game an 'play' thei lo a, player pakhat ve ve inhmachhawnah UAE an talbuai duh bawk si lo a, a tawpah a thiam zawkin a thiam lo zawk an nghaisa a ni ber.

Minute 12-na lekah Ali Mabkhout chuan UAE tan goal hmahruai a khung a, India offside trap siam bumin Fabio Lima hnen aṭanga a ball hmuh chu Gurpreet-a man phak lohin a pet khum a, a goal mawi hle.

Ka u Ali

UAE thiampuipa Ali Mabkhout-a'n a duhthalin India tlarhnung a ching chau a ni ber a, ball an chan chhunah India defender-ten an pet chhuah ṭhat hleihtheih bawk si loh avangin India-in UAE inkhel an en a ni ber.

Minute 30-naah UAE-in penalty an hlawh chhuak a, Fabio Lima-a shot chu Adil Khan chuan a kuta a lo dan per avangin penalty a chawi - Ali Mabkhout a lo pen chhuak a, goal-a chantir turin harsatna a tawk lo.

Goal dang lut loin chawlhlawk hman a ni a, Halicharan Narzary leh Mohammed Yasir-ten Lallianzuala leh Anirudh-te an rawn thlak a, game erawh a ngai reng a ni.

Minute 58-naah Stimac-a'n thutlukna ṭul lo tak a siam zui a, Liston leh India player khel ṭha awmchhun tih ngam Apuia la chhuakin Raynier Fernandes leh Ishan Pandita-a luhtir.

Mahse maw...

Stimac-a'n game thlak danglam tumin substitution-a siam a, mahse, India bawkin goal an chhuah nawn - minute 60-naah Mabkhout chuan a class pholangin tawih zetin a goal thumna a khung a, 'class' tih chu a sawifiahna awlsam ber a ni.

Kum 30 mi forward hian ram tan match 87-a khelhah goal 68-a khung tling ta a, UAE Pro League lamah Al Jazira tan season duhawm tak hmang mekin match 22-ah goal 21-a khung tawh!

UAE-in an duhtawk lo - Khalil, Fabio Lima leh Sebastián Tagliabúe-ten goal khat ṭheuh an rawn khung ve leh a, 6-0 a inkhel tawpin India an mualpho.

Apuia chuan, "Ṭhiante an zam deuh a, game play a harsa hle. Pressure pek pawh kan tisual lutukin a lang lo a, mahse, an thiam zawk miau avangin min vaw let thei zel a ni," tiin Vanglaini a hrilh.

An inthlau

FIFA ranking aṭang ringawta thlir pawhin team pahnih an inthlau tih a lang a, UAE hi 74-na an nih phak laiin India erawh 104-na an ni phak ṭawk - kar a zau hret.

UAE player-te hlutna belhkhawm kha India pawisain vaibelchhe 209 a tling a, Blue Tiger squad pumpui hlutna erawh vaibelchhe 33.32 bak a ni lo.

Lianzuala chuan, "Substitution kan siam hma lutuk kha kan tuar ni deuhin a lang. Keini aia team ṭha zawk kan tum a, an inlungrual a, game plan mumal tak an nei bawk. Kan nawr ve ṭhin a, mahse an tal chhuak thei zel a ni," tiin team pahnih inthlauhna Vanglaini a hrilh.

UAE tana khel ṭha em em mai Fabio Lima kha Brazilian a ni a, kum 27 mi forward hi UAE khua leh tui nihna nei a ni. Fabio ang thoa goal khungtu Sebastián Tagliabúe kha Argentine a ni a, ani pawh UAE khua leh tui nihna neitu a ni bawk.

Enchhinna

Stimac-a'n friendly match khelhpui turin Oman leh UAE a thlang a, team ṭha zawk tum chu an team tan hmasawnna tur pawimawh tak a nih thu a sawi.

Hemi a nih avang hian Croatian coach hian inenchhin nan game pahnih a hmang tih a lang a, mualpho chhuanlama hman erawh a thiang lo.

Tawnhriat nei ṭha leh ṭha lo khelh kawptir dan a thiam lo em ni chu aw, tih mai turin a player rem dan a mak a, team 'balance' aia 'enchhinna' a ngaih pawimawh avangin an chesual.

Stimac chuan, "Kan player-ten hei hi ISL-a ni lo tih an hriat a ṭha. ISL-ah chuan khelmual laiah duhtawka ball khawih turin hun leh hmun an nei a, ISL anga international football kan khel a nih chuan a tuartu tur kan ni," a ti a, an chak loh chhanah a player-te a dem.

Chhetri tel lohna

India team-a thil lang chiang tak pakhat chu Sunil Chhetri awm lo a ni a, kum 36 mi striker tel loin India tlarhma a hriam tawk lo a, khelmualah hruaitu ṭha an nei lo bawk.

Mitthlaah Jeje Lalpekhlua a lang lo thei lo a, Hnahthial tlangval hi 4-2-3-1 formation-ah Chhetri nen inkawp se, Thawhṭanni zan ang em chuan India an mualpho kher lo ang.

ISL lamah Manvir khel ṭha viau mah se international football meuha India hmatawngtu ber ni tur chuan a la nau deuh tih a lang a, Chhetri leh Jeje-a hnutchhiah pheikhawkah a ke a thawlh zo lo.

Punjab striker hian ball lak leh shot per chang nei mah se ball pera rang taka che dun ṭhin Chhetri leh Jeje angin thlawptu ṭha a nei lo a, India an mualpho phah.

Stimac-a sulhnu

India hian Stimac-a hnuaiah match 12 an khel tawh a, vawi khat chiah hnehna an la chang ve - vawi nga draw result neiin vawi ruk an tlawm. Hetih chhung zawng hian goal 11 chiah an khung a, an lamah goal 24-a lut!

Oman leh UAE laka hnehna chan zawh loh hi team pahnih quality enin thil awm reng a ni a, mualpho taka tlawm erawh a na bik - AIFF hotuten Stimac hi ban mai an rilruk hial tawh mai thei.

Stimac-a hnuaia India chak awmchhun hi King's Cup-a 1-0 a Thailand an hneh kha a ni a, Curaçao (3-1), Tajikistan(4-2), North Korea (5-2), Oman (2-1), Oman (1-0) leh UAE (6-0) ah te an tlawm.

India tlawmna hi a awm lo hran lo - mahse, Afghanistan (1-1) leh Bangladesh (1-1) inhnehtawkpuite kha UAE laka an mualpho takah chuan thuneituten an thlirlet ngei ang tih a chiang a, Syria (1-1), Qatar (0-0) leh Oman (1-1) erawh result chhia a ni lo thung.