FA Cup Semifinal Man City an lian fal, quadruple an beisei

Khawvela football inelna upa ber FA Cup vawi 138-na semifinal chu Wembley Stadium-ah khelh a ni dawn. Zanin dar 10 hian champion tura rinkai Manchester Cityleh Brighton & Hove Albion an inhmachhawn ang a, Pathianni zan dar 8:30-ah Watford leh Wolverhampton Wanderers te an inkhel ang.

League-a an point hmuh zat leh an sum sen zat thlirin Man City an ṭha fal a, chutihrualin club dang pathum pawh Premier League club vek an ni a. Wolves hian semifinal lut turin Liverpool leh Manchester United an hneh a ni.

Quadruple chu

Season khata nomawi lian pali chawi hi quadruple chu a ni a, English club tan chuan Champions League, Premier League, FA Cup leh League Cup champion nih a ngai. Tun dinhmunah Man City chu champion vek thei dinmunah an la ding.

English club zingah Manchester United chu 1998-99 season khan Sir Alex Ferguson kaihhruaina hnuaiah treble champion an ni a, Spainish club Barcelona chiah ṭum hnih treble champion thei an ni a. Catalan club treble champion puitu hmasa zawk hi tun ṭuma Man City manager Pep Guardiola hi a ni.

Tun season-ah Manchester City hian League Cup nomawi an chawi tawh a, Champions League-ah quarterfinal lutin Tottenham Hotspur nen pawh fuh an ni a, Premier League nomawi an kutah a la awm bawk.

Theihngilh ru!

Manchester City manager Pep Guardiola erawhin quadruple lam sawi rik hunin a la hre lo a, pressure neih belh a tum lo. Spanish manager chuan, "Kar khat emaw ni thum chhungin kan nomawi beiseina pathum hi a tawp vek thei. Vawi tam ka sawi tawh a, April thla tawpah min zawt ru," tiin an la beisei ngam loh thu a sawi.

Guardiola chuan sawi chhunzawmin, "England-ah hian sulhnu ropui tak tak a awm tawh. Liverpool ropui lai te, Sir Alex Ferguson hnuaia Manchester United te, Jose Mourinho kaihhruai Chelsea leh Arsene Wenger enkawl Arsenal te khan quadruple hi an thlentir lo. Chuvangin keini pawhin engtin nge kan theih bik ang?" tiin quadruple theihnghilh turin a hrilh.

Amaherawhchu Guardiola hian quadruple a beisei loh thu a sawi hnu hian Cardiff an hneh leh tawh a, Brighton laka an chak lo te a nih ngawt loh chuan quadruple nen hian an sawi kawp zel ang.

Brighton nen chuan...

Brighton & Hove Albion hian semifinal thleng turin Bournemouth hneh ve bawk mah se club dang pali an hmachhawn chu Premier League club lo vek an ni a, chutichung chuan an chak hram hram.

Hetihlai hian Man City erawh match tinah goal thum an khung tling ziah a, an match hmasa bera Rotherham United an hneh ṭum phei chuan 7-0 hialin an chak. Amaherawhchu Seagulls tana infuih phurna tur erawh Man City hian quarterfinal-ah Swansea City an hneh hram a, match tinin an goal khung zat a tla hniam bawk.

Man City manager Guardiola chuan, "Kan dam kim ṭep tawh. Kan inkhelh leh tur hi ka thlir tel ṭhin a, chutihrualin kan khelh laiah hian chak ngei ka duh ṭhin " tiin a player te dinhmun a sawi a, semifinal khel turin Sergio Aguero pawh a zin thu a sawi.

Giant killer Wolves

Wolverhampton hi Premier League kai thar ni mah se big six tih loah chuan an che ṭha ber a, club lian an ngam bawk. An match hnuhnung paliah ṭum hnih ngawt Manchester United an hneh a, Chelsea nen pawh an inhnehtawk.

Chutihrualin Wolves hian tla thei dinhmuna ding Burnley FC an hneh bik lo a, league-a an hnuai chiaha awm Watford lakah hian ngaih ṭha taka awm thei an ni lo. Premier League-ah Wolves hian club lian an ngam a, tun ṭuma an tum tur Watford erawh club lian an ni lo.

Watford striker Troy Deeney chuan, "FA Cup semifinal hi ka khelh tawh avangin ka match khelh tawha pawimawh ber a ni lo a, chuvangin match pakhat ve chauhah ka ngai," tiin a sawi a, semifinal ringawtah a lungawi lo a, final thlen ngei a duh.

Tun season-a an intawn chhunah Watford hian Wolves hi an mualah 2-0 in an hneh tawh a, Wembley Stadium-ah hneh nawn ngei an tum ang.