New Zealand-in World Cup squad puang

England leh Wales-in Cricket World Cup 2019 an thlen tur atan New Zealand chuan squad an puang fel der a, May 30 aṭanga khelh ṭan tur inelna puala squad puang hmasa ber ram an ni.

Kum 28 mi wicketkeeper Tom Blundell chu rin loh takin koh zingah a tel a, one day international-ah ram tana la inlan ngai lo a ni - twenty20-ah chuan match thum a khel ve tawh a, test match thumah a inlan tawh bawk.

Ludhiana, Punjab-a piang Ish Sodhi chu New Zealand squad-ah hian telh a ni a, kum 26 mi leg-spinner hi Todd Astle aiah ram tana inlan tur hian koh a ni.

Kum 35 mi batsman Ross Taylor chu koh zingah a la tel a, a inlan a nih chuan New Zealand cricketer zinga World Cup vawi li khel thei pasarihna a ni ang.

Black Caps (New Zealand cricket team sawina) hian player langsar zingah fast bowler Tim Southee leh opener Martin Guptill te pawh an ko a, World Cup-a an vawi thum inlanna tur a ni.

July 14-a final khelh tur World Cup-ah hian team 10 telin New Zealand bakah England, South Africa, India, Australia, Pakistan, Bangladesh, Sri Lanka, Afghanistan leh West Indies te an inel dawn.

Team 10 hi an intum kual vek ang a, a tawpah a sang paliin semifinal an khel dawn a ni.

New Zealand World Cup squad: Kane Williamson, Tom Blundell, Trent Boult, Colin de Grandhomme, Lockie Ferguson, Martin Guptill, Matt Henry, Tom Latham, Colin Munro, Jimmy Neesham, Henry Nicholls, Mitchell Santner, Ish Sodhi, Tim Southee, Ross Taylor.