Khawvela stadium ṭha ber tur Bernabeu?

Real Madrid president Florentino Perez chuan kum li chhung a chei ṭhat hna thawh tur Santiago Bernabeu chu khawvela stadium ṭha ber a nih tur thu a sawi.

Mi 81,000 lenna stadium hi mipui len tam zawng hi tih danglam a ni dawn lo a, Perez chuan chei ṭhat a nih lai hian an khelmual chu dan pangngaia an hman reng theih tho tur thu a sawi bawk.

Perez chuan, "A tawi zawnga sawi chuan kan hma hun khawvel atana digital stadium nih tir kan duh a ni. Madrid khawpui laili taka awm stadium hi khawvela ṭha ber a ni dawn," a ti.

Real stadium chei ṭhat tur hi 66,000 square metre-a zau a ni dawn a, chawlh hahdamna leh intihhlimna hmunte pawh a awm nghal vek ang.

Santiago Bernabeu hi a chung khuh theihin siam a ni dawn a, 360-degree video scoreboard a awm ang a, Bayern Munich stadium Allianz Arena pawn lamin mawi taka light a pe chhuak thei ang hian a pawn lam chu duan a ni dawn bawk.