Wolves lakah Man United an mualpho nawn

Season thara Champions League khelh tum Manchester United chuan Molineux-ah Wolverhampton Wanderers 2-1 in an hneh lo a, Ole Gunnar Solskjaer an dah ngheh hnua an match hnihna chauh niin an chak lohna hmasa ber a ni thung.

Thawhlehni zan Premier League inkhelah United-in Scott McTominay hmangin minute 13-naah hma an hruai a, mualneitu lamin minute 25-naah Diogo Jota hmangin an sut. United defender Ashley Young chu minute 57-naah hnawhchhuah a ni a, minute 77-naah Chris Smalling-a'n an lamah tilutin Wolves 2-1 in an chak.

Mualpho nawnna
FA Cup quarterfinal-ah Wolves-in United hi an mualah 2-1 in an hneh tawh a, Solskjaer-a hoten fimkhur a ṭul tih hrechungin Molineux an tlawh.

Wolves keeper Rui Patricio-a'n hnai tak aṭanga Jesse Lingard leh Romelu Lukaku te tauh goal tur chu a dang ve ve, amaherawhchu yard 22-a hla aṭanga McTominay pet erawh a dang thei lo.

United chance neih thlirin hmahruai an phu a, chutihrualin point an hmuh loh chhanah anmahni bawkin mawh an phur. Brazilian midfielder Fred chuan an goal aṭanga yard 30-ah ball hlohin Wolves lamin goal khung nan an hmang.

Young-a tackle dan hlauhawm tak avangin referee Mike Dean tan loh theih loin yellow card phawrh a ṭul a, hemi hmaa card a hmuh tawh avangin United defender hi hnawhchhuah ṭul phah.

Wolves chakna goal luh danah United tlarhnungin an tihtur an ti lo a, Phil Jones-a'n ball kangah Raul Jimenez a ngam lo zawk a, hemi per hi David de Gea-a'n a man hmaa Chris Smalling a tlak zep avangin sawisel boin ball-in goalline a pel.

United manager Solskjaer chuan, "Tihsual eng emaw zat kan nei a, goal khatna pawh kha kan tihsual aṭanga lut a ni," tiin an khelh ṭhat tawk loh vanga point hloh an nih thu a sawi.

Club lian ngamtu Wolves
Wolverhampton Wanderers hian club lian paruk lakah point an hlawh chhuak vek. Manchester City lakah point khat an hlawh chhuak a, Liverpool leh Tottenham lakah point thum ve ve hlawh chhuakin Chelsea leh United lakah point li an hlawh chhuak.

Wolves hian Emirates Stadium-ah Arsenal an chelh tawh a, London club hi an mualah an mikhual dawn bawk. Premier League kai thar Wolves hian Nuno Espirito Santo kaihhruaina hnuaiah pasarihna an awm mek a, FA Cup-ah semifinal an thlegn bawk.

Nuno Espirito Santo chuan, "Football ṭha tak kan khel a, zan duhawm tak a ni. Kan naute an theihna zawng zawng bakin an khel a, an thawhrim rah kan seng. Chutihrualin player 10 an ni chung pawhin United khelh an harsa hle," tiin a sawi.