Westbrook-a'n Wilt a nihrual

Russell Westbrook chuan mellung pawimawh a phun leh ta. Nimin zing khan Oklahoma City Thunder thiampuipa hian Los Angeles Lakers lakah point 20 leh rebounds vawi 20 a neih bakah assist ṭum 21 a nei a, NBA match khat chhunga hetiang ti thei player pahnihna chiah a ni.

Kum 1968 khan legend Wilt Chamberlain chuan match khatah point 22, rebounds vawi 25 leh assists vawi 21 a nei thei a, Wilt leh Westbrook te chiah hi point, rebound leh assist vawi khata 20 ṭheuh nei thei awmchhun an ni.

Westbrook awmna Thunder hian Lakers lakah hian 119-103 in hnehna an chang a, regular season hman laiah vawi 45 an chakna chiah niin playoff khel phak chin pariatnaah an awm mek - Inrinni zing hian Eastern Conference lama parukna Detroit Pis­tons nen an inkhel leh ang.

Kum 30 mi Westbrook chuan a record siam chu Pa­thiannia Los Angeles khawpuia thuamhnaw dawra an kah hlum tak a lai­na hnai Nipsey Hussle tan a hlan thu sawiin, "Ka tan a ni lo, hei chu Nipsey tan a ni, thlamuang takin chawl nang che," tiin a thlah.

NBA champion lai Gol­den State Warriors chuan nimin zing khan Denver Nuggets chu 116-99 in an sawp a, point 21 a score bakah assist vawi ruk neitu Kevin Durant chu player langsar a ni.

GSW hi nomawi hum­him thei tura ngaih an ni a, an boruak pawh a ṭha. Mahse, an match hma­sa lama Minnesota an hneh loh ṭumin Stephen Curry, Kevin Durant leh Draymond Green ten official an sawisel avangin pawisa chawitir an ni.