Karate player 23 feh chhuak

KAI Junior National Karate Championship 2019 chu April 5-7 chhung hian Guwahati, Assam-ah neih a ni dawn a, inelna hmachhawn tur hian All Mizoram Karate Association (AMKA) leh Mizoram State Sports Council ṭangkawp chuan nimin khan infiammi 23 leh official pali a tir chhuak.

Inelna hi India ram chhunga karate huang bikah chuan a sang ber a ni a, medal la phak chin chu tun season chhunga international tournament hrang hrangah India aiawh turin an tling dawn a ni.

AMKA senior vice president R. Zomawia chuan, "February thla tir lam aṭang khan Venghlui Hall leh hmun remchang dangah inbuatsaihna kan nei tawh a, coach leh player ten theihtawp an chhuah avangin tun ṭumah hian medal kan lak phak ngei pawh kan beisei," tiin Vanglaini a hrilh.

Mizoram Karate team te hi coach Sempai Lalrinzuali chuan ngawrh takin training a neih pui, zin chhuak hi player bakah national referee - Sensei Lalropuia leh Sensei Lalramtharate bakah AMKA president C. Dosavunga ten an ho a ni.