Mizo football legend Mama coach a ni dawn

Mizo footballer-te tana sulsutu S. Malsawmtluanga (Mama) chuan football khelh a chawlhsan hnuin season thar aṭangin coaching lam a luhchilh dawn a, tualchhung club ṭha Chanmari FC a enkawl dawn.

March 31, Inrinni khan Mama leh  Chanmari FC te hian season khat daih inremna thuthlung an ziak a, Chhinga Venga cheng Mama hian 2019-20 season chhung Chanmari FC head coach hna hi a chelh ang. Club chairman Zothantluanga chuan, "Mizo faten Mizo footballer zinga kan ngaihsan leh sulsutu hmasa kan thawhpui thei hi kan lawm takzet a, kan club hian bung thar kan kai a ni. Beiseina sang tak khelmual chhung leh pawnah kan nei a, he season chhung hian Mama hovin no mawi chawi ngei kan tum ang," tiin season hnih chhung nomawi an chawi loh hnuah champion ngei an tum thu a sawi.

Chanmari coach thar S. Malsawmtluanga chuan "Chanmari FC nen kan thawkho thei hi ka lawm hle a, ka tan chuan coach anga ka hna hmasa ber  a ni dawn a, chona lian leh pawimawh tak a ni ang. Fan-te ṭanpuina ka mamawh dawn a, kan team ṭawiawma thlawp tlat turin ka sawm a ni. Ka innghahna chu Pathian a ni a, theihtawpa ṭawngtaina lamah pawh min hre reng turin ka ngen a che u,” tiin a sawi.

Mama hi India rama football zirna ṭha ber Tata Football Academy aṭanga Mizo zirchhuak hmasa ber a ni a, India ram club lian inchuhna karah East Bengal-in changin hemi hnu hian club ṭha dang Salgaocar, Mohun Bagan leh United SC tan te a khel a, ISL ṭantirh khan Delhi Dynamos tan a khel bawk.

Mizo legend hian a hun tawp hi NorthEast aṭanga I League champion awmchhun Aizawl FC-ah a hmang. Season liam ta khan club khelhna nei lo mah se Aizawl High School leh Republic GSA te nen ṭangkawpin M28 football Academy an din a ni. Chanmari FC hian season liam ta khan MPL semifinal thleng mah se final an thleng zo lo a, MPL5-a an champion hnuah Chhinga Veng leh Aizawl FC tluk loin nomawi an chawi leh tawh lo.