Mizoram Pachak ber Chama

P. Lalchamliana khum thei an la awm lo, Lunglei pachak hian Mizoram Pachak 2019 zawnnaah pakhatna dinhmun a luah. Inelna chi hrang 13 an neih zawh hnuah Chama hian point 196 hmuin a chung berah a awm.

Mizoram Powerlifting Asso-ciation leh Zonet ten an buatsaih Mizoram Pachak zawnnaah hian inelna tawp ber zan a thlen hma hian Chama leh Ngurthanzauva Sailo te chuan point 176 ve ve an hmu a, thingtum inchar tam siak (log press) hmanga inelna neih leh niin Chama hian vawi 13 chawiin a chungnung ber.

Chama bawk
Inrinni zan khan Hawla Auditorium-ah inelna neih a ni a, thingtum inchar tam siak turah thingtum a remchan loh avangin thir tum (80kg) a rit chu an chawi thung. Chhuata thirtum awm chu nghawng zawn hma lamah lak kan tur a ni a, lu chungah ban lehlam ve ve a ruala marin an char kang. Lu chunga char kan lai hian kaihza, kiu leh kawng a mar vek tur a ni a, ke pahnih a lei/chhuat rahna chu a che sawn tur a ni lo.

Pachak 12 in inelna an hmachhawn chinah Lalhriatrenga chuan vawi 12 chawiin a che fuh ber a ni a, a tawpah hmahruaitu pahnih Chama leh Ngura te khek khal an ni. Chama a rawn ding chhuak a, zo tak maiin thir tum chu la chhoin vawi 13 ngawt mai a char - Hriatrenga record rawn khumin dinhmun duhawm takah a ding.

A tawpah Chama el turin Ngura a rawn ding chhuak, Thingsulthilah tlangval hian zo takin vawi kua a chawi thei. Mahse, champion lai khum turin thahrui a nei tam tawk lo a, uiawm takin pahnihnaah a lungawi a ṭul phah - Chama leh Ngura te hi point sarih chauhin an inthlau a ni.

Chama a lawm
Powerlifting huang bikah national level-a gold pali la tawh Chama hi 2011-a Mizoram Pachak an zawn khan pakhatna a lo ni tawh bawk a, tun ṭumah hian amah elphak leh tibuai phak nei mah se a tawpah erawh a tawnhriat ngahna leh tha chak zia chu thup theih a ni lo.

Chama chuan, "Ka lawm takzet, ṭawngaina rah a ni. Inelna kan hmachhawn chhungin taksa lamah harsatna deuh awm ve thei mah se min ṭawngṭai puitu an tam avangin ṭha takin ka hmachhawn thei," tiin Vanglaini a hrilh. Lunglei pachak hian hnehna a chan hnuah "Ka Chakna Lalpa" tih inziahna T-Shirt chu mipui hmuh theih turin a rawn pho chhuak a ni.

Mizoram Police ṭang lai Chama hian powerlifting bakah judo leh wrestling huangah Mizoram tan medal a la nual tawh a, nikum khan World Master Powerlifting Championship-ah bronze medal a lo la tawh bawk.