Miami Open champion Barty

Inrinni zan khan Miami Open hmeichhe singles final khelh a ni a, Ashleigh Barty chuan world number 1 hlui Karolina Pliskova hnehin a champion - Australian nula tan tennis a khelh hun chhunga a nomawi chawi lian ber a ni.

Kum 22 mi Barty hian 7-6 (7-1), 6-3 in hnehna a chang, tun kara WTA ranking chhuak tharah chuan a sang 10 zingah a tel phak tawh ang. 2013 khan Australian nula Samantha Stosur a lo champion tawh bawk a, Australian hmeichhe player zingah Stosur hnung zui leh thei hmasa ber a ni nghal bawk.

Darkar khat leh minute 40 chhunga hnehna changtu Barty chuan, "Inelna hrang hrangah champion ka châk a, Miami Open hi nomawi chawi ka chak berna zinga mi a ni. Tunah hian ka chawl thiang lo, tharum ka ngah zual nan ka thawkrim chhunzawm dawn a ni," tiin a sawi.

Mipa lamah Roger Federer chuan Dominic Thiem hnehin final a inhlangkai, nizan khan Grand Slam vawi 20 champion tawh Federer leh Miami Open champion lai John Isner ten final an khel chhunzawm a, he thu buatsaih lai hian result kan hre hman lo.