Rangers an tlawm ve ta

Steven Gerrard-a enkawl Rangers chu tun season-a a vawi khat nan Europa League-ah an tlawm ve ta a, an tlawm chhun erawh match pawimawh lai ber a ni thung - last 16 second leg-ah Slavia Prague chu 2-0 in an ngam lo a, Europa League an mangṭha. 

Rangers hian Slavia Prague khelmuala first leg inkhelah 1-1 result an hlawhchhuah avangin quarterfinal an luh mai rinna a sang hle. Mahse, an mualah Rangers an thamral.

Prague tan Peter Olayinka chuan minute 14-na lekah goal hmahruai a khung a, Nicolae Stanciu chuan minute 74-naah a chhunzawm ve leh bawk. Rangers-in hun tawp thlengin goal an khung ve thei lo a, inkhel hmasa nena belhkhawmin 3-1 in an tlawm a, European football an mangṭha. 

Scottish champion Rangers-in chhuanlam tur an zawng a nih chuan chhuanlam tur a awm - bench aṭanga luhtir Kemar Roofe chuan khelmualah minute ruk chiah hun a hmang hman tihin minute 61-naah hnawhchhuah a ni. 

Roofe hi minute 55-naah luhtir a ni a, goal khung a tumna lamah Slavia goalkeeper Ondrej Kolar hmaiah chiang takin a tlawh a, referee-in red card a phawrh nghal. 

Goal khung mamawh Rangers-in an mamawh loh zawk red card bawk an hmu leh a, Leon Balogun chu minute 73-naah a yellow card pahnihna hmuin hnawhchhuah a ni - Stanciu-a'n goal a khung zui a, Rangers tan thawh leh ngaihna a awm tawh lo. 

Ibrox Stadium-a inkhelah hian Rangers midfielder Glen Kamara leh Slavia player Ondrej Kudela-ten hun tawp lamah buaina an nei a, Kamara chuan a vun rawng vanga hmusit taka ṭawngkhum a nih thu Gerrard-a hrilh. 

Gerrard chuan, "Ka player khan a vun rawng vanga mawi lo taka ṭawngkhum a nih thu min hrilh a, thil duhawm lo tak chu Slavia lamin heti chunga an player an ṭan kha a ni. 

"Ka thin a rim takzet a, Glen hi ka mi hriatchian a nih avangin 100% in ka ring thlap. Slavia player avanga thil thleng kha a lawmawm lo a, thuneituten hma an lak vat ka beisei. Engpawh thleng se, Glen lamah ka ṭang tlat a ni," tiin a player chhan a ti na hle.